20 Yanvar faciəsinin ildönümü ilə əlaqədar Kocaelidə mətbuat konfransı keçirilib

Konfransda Xocalı soyqırımı və Azərbaycan həqiqətləri ilə bağlı digər faktlar da bir daha jurnalistlilərin diqqətinə çatdırılıb

1990-ci il yanvarın 20-də sovet ordusu tərəfindən Bakıda həyata keçirilmiş qanlı hadisələrin 25-ci ildönümü ilə əlaqədar Türkiyə Azərbaycan Dərnəkləri Federasiyasının sədri Bilal Dündar Türkiyənin Kocaeli şəhərində - Heydər Əliyev adına Azərbaycan Mədəniyyət Evində mətbuat konfransı keçirib. Diasporla İş üzrə Dövlət Komitəsindən qəzetimizə verilən məlumata görə, tədbirdə Bilal Dündarla yanaşı, təşkilatın idarə heyətinin üzvləri Volkan Aydemir, Vahid Korkmaz, İbrahim Baylan, Hakan Has, Anar Əsədov, İlhan İşbaşı, azərbaycanlı tələbələr Tural Tahirli və Zaur Həsənov iştirak edib.

20 Yanvar faciəsi haqqında jurnalistlərə məlumat verən Türkiyə Azərbaycan Dərnəkləri Federasiyasının sədri Bilal Dündar hadisənin azərbaycanlıların mübarizə gücünü qırmağa yönəldiyini deyib: "Sovet ordusunun Azərbaycan xalqının milli müstəqillik mübarizəsini boğmaq üçün hazırlanmış və Bakıda reallaşdırılmış bu hücum nəticəsində Azərbaycanın 130-dan çox dinc vətəndaşı şəhid olub, 600-dən çox insan yaralanıb". 1990-cı ildə Bakıya yeridilmiş 35 minlik ordunun təkibində erməni əsgərlərinin olduğunu da vurğulayan Bilal Dündar bildirib ki, bütün bunlar azərbaycanlıların mübarizə əzmini qıra bilməyib, qanlı hadisədən sonra elan olunmuş hərbi vəziyyətə baxmayaraq, bir milyon Azərbaycan türkü Azadlıq meydanına axışaraq, müstəqllik mübarizəsini davam etdirib.

Mətbuat konfransında, eyni zamanda Ermənistanın Azərbaycan ərazilərinin 20 faizini işğal altında saxlaması, bir milyondan artıq insanın qaçqın vəziyyətində yaşaması, Xocalı soyqırımı və Azərbaycan həqiqətləri ilə bağlı digər faktlar da bir daha jurnalistlilərin diqqətinə çatdırılıb. Tədbirdə 1915-ci ildə Türkiyədə baş vermiş hadisələrə də toxunulub, qeyd olunub ki, həmin vaxt "Böyük Ermənistan" vədi ilə üsyan edən ermənilər Ərzurum, Qars, Ağrı və digər bölgələrdə türklərə qarşı dəhşətli qırğınlar törədiblər.

Qeyd edək ki, mətbuat konfransı yerli KİV-də geniş işıqlandırılıb.

NƏZAKƏT