Hikmət Babaoğlu: “Panidealist dövlətlərin xarici siyasətində səmimiyyət yoxdur”

"Ümumiyyətlə siyasətdə səmimiyyət çox az rast gəlinən, hətta deyərdim ki, nadir hadisədir. Panidealist dövlətlərin xarici siyasətində isə ümumiyyətlə səmimiyyətdən söhbət gedə bilməz". Bu fikirləri SİA-ya "Yeni Azərbaycan" qəzetinin baş redaktoru, politoloq Hikmət Babaoğlu Milli Şuranın sədri Cəmil Həsənlinin ABŞ-ın Azərbaycandakı səfiri ilə görüşünə və həmin görüşdən sonra amerikalı diplomatın Azərbaycan müxalifətini təlimatlandırması, o cümlədən maliyyələşdirməsi iddialarını qəbul etməməsinə münasibətini bildirərkən deyib. Hikmət Babaoğlu qeyd edib ki, məhz konkret hadisədən sonrakı verilən açıqlama da qeyri-səmimiyyətin bir nümunəsidir. Politoloq sual edib: "Əgər birisi ilə hansısa formada heç bir ortaq marağın və məqsədin yoxdursa, o zaman həmin şəxslə görüşü zəruri edən səbəb nədir? Təkcə bu məntiq ABŞ səfirinin məlum açıqlamasının qaneedici olmadığını göstərir. Bütün bu kimi qeyri-səmimi davranışlara rəğmən, Azərbaycan ictimaiyyəti nəyin yalan, nəyin doğru, kimin kim olduğunu çox yaxşı bilir ve adekvat qiymətləndirməyi bacarır".

sia.az