Mətyu Brayzə: “Cənub” qaz dəhlizi layihəsinin reallaşması üçün bütün öhdəliklər yerinə yetirilib

"Cənub" qaz dəhlizi layihəsinin reallaşması üçün lazımi razılıqlar alınıb, bütün öhdəliklər yerinə yetirilib və nəql olunacaq qazın alıcıları ilə müqavilələr imzalanıb. Bu sözləri ABŞ-ın Azərbaycandakı keçmiş səfiri Mətyu Brayzə deyib.

Azərbaycan Respublikası Dövlət Neft Şirkətinin (SOCAR) Trans-Anadolu qaz boru kəməri – TANAP layihəsindəki səhmləri dünyanın qabaqcıl investisiya banklarından olan "Goldman Sachs"a satması məsələsinə münasibət bildirən M.Brayzə qeyd edib ki, dünya bazarında neftin qiymətinin ucuzlaşdığı bir zamanda SOCAR-ın bu addımı atması başa düşüləndir.

Azərbaycanın "Şahdəniz-2" yatağından hasil olunacaq qazı Türkiyəyə və qardaş ölkədən də Avropaya nəqlini nəzərdə tutan TANAP-ın uzunluğu təxminən 1850 kilometrdir. TANAP Türkiyənin Gürcüstanla sərhədindəki Ardahan vilayətinin Posof mahalından başlayaraq 21 vilayətdən keçməklə qardaş ölkənin Yunanıstanla sərhədindəki Ədirnə vilayətinin İpsala qəsəbəsinədək uzanacaq. Boru kəmərinin 2018-ci ildə istismara verilməsi planlaşdırılır. TANAP-la Avropaya 10 milyard, Türkiyəyə isə 6 milyard kubmetr Azərbaycan qazının nəqli nəzərdə tutulur. İlkin ötürücülük qabiliyyəti ildə 16 milyard kubmetr olacaq kəmərin bu tutumunun 2023-cü ildə 23 milyard kubmetrə və 2026-cı ildə isə 31 milyard kubmetrə çatdırılması nəzərdə tutulur.

"Cənub" qaz dəhlizinin ən uzun hissəsini təşkil edən TANAP Cənubi Qafqaz Boru Kəmərindən alacağı təbii qazı 2020-ci ilin əvvəlindən etibarən "Trans-Adriatik" (TAP) boru kəmərinə qoşularaq Yunanıstan, Albaniya və İtaliyadan keçməklə Avropaya çatdıracaq.

TANAP-ın səhmdarlarının bu layihədə payı belədir: "Cənub" qaz dəhlizi" Qapalı Səhmdar Cəmiyyəti (QSC) - 58 faiz, BOTAŞ - 30 faiz və bp şirkəti - 12 faiz.

yap.org.az