Siyəzən seçiciləri YAP-ın namizədinə səs verəcək

54 saylı Şabran-Siyəzən Seçki Dairəsindən Yeni Azərbaycan Partiyasının namizədi Tahir Süleyman oğlu Süleymanovun təşviqatı ilə əlaqədar görüşlər davam etdirilib. Milli Məclis üzvlüyünə namizəd Tahir Süleymanov yüzlərlə seçicinin iştirak etdiyi Siyəzən rayonunun Sədan, Zarat və Beşdam kəndlərində görüşlər keçirib. Seçicilər Milli Məclis deputatlığına namizəd Tahir Süleymanovu səmimiyyətlə, xoş münasibətlə qarşılayıblar.

Keçirilən görüşlərdə YAP Siyəzən rayon təşkilatının sədri Etibar Heydərov çıxış edərək YAP-ın namizədi Tahir Süleymanovun həyat və fəaliyyəti ilə bağlı məlumat verib. O, qeyd edib ki, Yeni Azərbaycan Partiyası xalqın böyük rəğbətini qazanmış, nüfuzlu, kütləvi siyasi təşkilatdır: "Özünü yekdil siyasi qüvvə kimi təsdiqləyən bu partiyaya xalq həmişə inanıb, güvənib, səs verib. Bu, xalqın Yeni Azərbaycan Partiyasına böyük inamının, rəğbətinin nəticəsidir. YAP uzun illərdir ki, parlamentdə çoxluq təşkil edən partiya kimi tanınır. Bu baxımdan, partiyamızın Milli Məclisdə mütərəqqi, humanist qanunların qəbulunda, milli qanunvericiliyimizin inkişaf etdirilməsində rolu çox böyükdür. Yeni Azərbaycan Partiyası hər zaman ölkənin inkişafı, xalqın rifahı naminə fəaliyyət göstərir. Bu səbəbdən, seçicilər YAP-ın fəaliyyətini çox müsbət qarşılayırlar, partiyanın mövqeyini yüksək səviyyədə dəstəkləyirlər. Partiyanın 1993-cü ildən bu günə qədər ölkədə keçirilən bütün seçkilərdə inamlı qələbə qazanması bunu əyani şəkildə sübut edir. Odur ki, bu seçkidə Yeni Azərbaycan Partiyasının amalı "Yeni hədəflərə doğru!" şüarıdır. Yeni Azərbaycan Partiyası ölkənin aparıcı siyasi qüvvəsi kimi, parlament seçkilərində ən böyük qələbəyə layiqdir. Ümummilli Lider Heydər Əliyevin qurucusu olduğu Yeni Azərbaycan Partiyası hər zaman xalqın böyük dəstəyini qazanıb".

E.Heydərov daha sonra qeyd edib ki, Yeni Azərbaycan Partiyasından Milli Məclis üzvlüyünə namizəd Tahir Süleymanov böyük həyat təcrübəsinə malik bir insandır və müsbət şəxsi keyfiyyətləri ilə fərqlənir: "Tahir Süleymanov bir ziyalı və Yeni Azərbaycan Partiyasının üzvü kimi, fəallığı, təşəbbüskarlığı ilə seçilir. O, elin, camaatın, sadə insanların rəğbətini qazanmış, ləyaqətli bir insandır. Deputatlığa namizəd T.Süleymanov seçiciləri maraqlandıran məsələləri, onların qayğılarını yaxşı bilir, problemlərin səmərəli həlli yolunu tapmağı bacarır. O, Yeni Azərbaycan Partiyasının namizədi kimi, sizə, sizin seçiminizə güvənir. Deputatlığa namizəd Tahir Süleymanov səmimiyyətinə, biliyinə, intellektinə, mədəniyyətinə, əsil ziyalıya xas olan davranışına görə, hər cəhətdən millət vəkili seçilməyə layiqdir. Milli Məclis üzvlüyünə Yeni Azərbaycan Partiyasının namizədi kimi, o, üzərinə düşən böyük məsuliyyəti çox yaxşı hiss edir".

Yeni Azərbaycan Partiyasının 54 saylı Şabran-Siyəzən Seçki Dairəsindən namizədi Tahir Süleymanov keçirilən görüşlərdə dolğun, məzmunlu çıxış edib. Deputatlığa namizəd seçicilərin təbliğat-təşviqat kampaniyasında fəallıq göstərməsindən razı qaldığını söyləyib: "Millət vəkili seçiləcəyim təqdirdə, çalışacağam ki, mənə göstərilən etimadı tamamilə doğruldum, Milli Məclisin üzvü kimi üzərimə düşən vəzifənin öhdəsindən layiqincə gəlim. Əlbəttə, istənilən seçkidə həlledici söz sahibi məhz seçicilərdir. Kimin millət vəkili seçiləcəyini də bilavasitə seçicilər həll edir. Bu xoş diqqət, səmimi münasibət müqabilində, inanıram ki, Siyəzən sakinlərinin etibarını, səsini qazana biləcəyəm. Milli Məclis üzvlüyünə namizəd kimi, 1 noyabr parlament seçkilərində hər bir seçicinin səsini qazanmağa çalışıram. İnanıram ki, bu seçkilərdə seçicilərin etimadını qazana biləcəyəm. Seçiciləri bu seçkidə fəallığa, doğru, ədalətli seçim etməyə dəvət edirəm".

Deputatlığa namizəd Tahir Süleymanov seçicilərə öz seçki platforması barədə də geniş məlumat verib və millət vəkili seçiləcəyi təqdirdə, görəcəyi işlər, deputatlığa namizəd kimi, fəaliyyət planı barədə danışıb. O, seçicilərin qaldırdığı məsələlərə münasibət bildirib, onların müvafiq suallarını dolğun, ətraflı şəkildə cavablandırıb.

Milli Məclis üzvlüyünə namizəd Tahir Süleymanovun təbliğat-təşviqat kampaniyası, seçicilərlə görüşləri davam edir.

sia.az