KİVDF qalibləri mükafatlandırıb

Dünən Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) 31 Dekabr - Dünya Azərbaycanlılarının Həmrəyliyi Günü və Yeni İl münasibətilə keçirdiyi fərdi jurnalist yazıları müsabiqəsinin qaliblərinin mükafatlandırılması mərasimi keçirilib. Mərasimdə dövlət və hökümət nümayəndələri, millət vəkilləri, elm adamları, ziyalılar və KİV rəhbərləri iştirak ediblər.

Azərbaycan Respublikasının Dövlət Himninin səsləndirildikdən sonra mərasimi açan Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli media nümayəndələrini qarşıdan gələn 31 Dekabr Dünya Azərbaycanlılarının Həmrəyliyi Günü və Yeni il münasibətilə təbrik edib, onlara yaradıcılıq uğurları arzulayıb.

KİVDF-nin icraçı direktoru qeyd edib ki, 2015-ci il Azərbaycan üçün yadda qalan il olub: "Bu il Azərbaycanda ilk Avropa Oyunlarının keçirilməsi ölkəmizin tarixinə qızıl hərflərlə yazılıb. Avropa Oyunları Azərbaycanı bütün dünyaya tanıtdı. O cümlədən də ölkəmiz Avropaya bir nümunə sərgilədi. Bu il Milli Mətbuatımızın 140 illiyinin də təntənəli surətdə qeyd olunması tarixi günə çevrildi. Azərbaycan Prezidenti İlham Əliyevin müvafiq Sərəncamına əsasən 180 jurnalistə fərxri adlar, orden və medallar təqdim edildi".

V.Səfərli diqqətə çatdırıb ki, fond il ərzində 11 fərdi yazı müsabiqəsi təşkil edib: "600-dən artıq jurnalist bu müsabiqələrdə iştirak edib, 450-yə yaxın jurnalist mükafatlandırılıb. Budəfəki müsabiqəyə isə 60 media orqanından 156 yazı təqdim olunmuşdu. Yazılar 12 ekspert tərəfindən qiymətləndirilərək, 113 qalib müəyyənləşib".

Daha sonra çıxış edən Azərbaycan Prezidentinin İctimai-siyasi məsələlər üzrə köməkçisi Əli Həsənov qalib gələn bütün jurnalistləri səmimi qəlbdən təbrik edib. Ə.Həsənov bildirib ki, Azərbaycan dövləti KİV-lərin müstəqilliyinin gücləndirilməsi istiqamətində səylərini davam etdirəcək: "2015-ci il Azərbaycan Milli Mətbuatı, o cümlədən də milli kütləvi informasiya vasitələri üçün uğurlu il olub və əlamətdar hadisələrlə yadda qalıb. Təməli Ümummilli Lider Heydər Əliyev tərəfindən qoyulmuş söz və məlumat azadlığının daha da inkişaf etdirilməsi və KİV-lərin sərbəst fəaliyyətinə hərtərəfli dövlət dəstəyi sayəsində milli informasiya resurslarının kəmiyyət və keyfiyyət göstəriciləri daha da yüksəlib, onlar öz əhatə dairəsini və auditoriyasını genişləndirməyə müvəffəq olub, beynəlxalq informasiya məkanının fəal iştirakçısına çevriliblər. Azərbaycan Respublikasının Prezidenti Cənab İlham Əliyev hər zaman Azərbaycan mediasının inkişafı məsələlərini diqqət mərkəzində saxlayıb, onun problemlərinə xüsusi həssaslıqla yanaşıb və kütləvi informasiya vasitələrinin hərtərəfli inkişafına zəruri dəstək verib".

Prezidentin köməkçisi bildirib ki, hazırda Azərbaycanda 5000-dən artıq KİV uçota götürülüb və ya müvafiq dövlət orqanında qeydiyyatdan keçib: "Ölkədə 50-dən çox televiziya və radio kanalı, 300-ə yaxın dövri mətbu nəşri, 100-dən artıq jurnal, onlarla informasiya agentliyi, jurnalist təşkilatı, yayım şirkəti, 300-dən çox fəal internet saytı fəaliyyət göstərir. Azərbaycan Respublikası Prezidentinin "Azərbaycan milli mətbuatının 140 illik yubileyinin keçirilməsi haqqında" 2 iyun 2015-ci il tarixli Sərəncamına əsasən Azərbaycan Milli Mətbuatının 140 illiyi ilə əlaqədar yubiley tədbirlərinin keçirilməsinə dair Tədbirlər Planı təsdiq olunub. Tədbirlər planına uyğun olaraq Zərdab, Masallı, Qəbələ, Quba rayonlarında və Gəncə şəhərində regional konfranslar keçirilib. Bundan başqa Bakı Dövlət Universiteti, Mədəniyyət və Turizm Nazirliyi, habelə rayon və şəhər icra hakimiyyətləri Milli Mətbuatın 140 illiyi ilə əlaqədar konfranslar təşkil ediblər".

Ə.Həsənov onu da bildirib ki, Azərbaycan Prezidentinin Sərəncamına uyğun olaraq Azərbaycan Prezidenti Administrasiyasına redaksiyalardan və jurnalist təşkilatlarından KİV əməkdaşının dövlət mükafatlarına layiq görülməsi ilə bağlı 800-ə yaxın təqdimat daxil olub: "Azərbaycan Prezidentinin 15 iyul 2015-ci il tarixli Sərəncamlarına əsasən Azərbaycan Milli Mətbuatının inkişafında xidmətlərinə görə 180 nəfər KİV əməkdaşına müxtəlif dövlət mükafatları və fəxri adlar verilib. Onlardan 2 nəfər Azərbaycan Prezidentinin təqaüdünə, 1 nəfər 2-ci dərəcəli "Vətənə xidmətə görə" ordeninə, 4 nəfər 3-ci dərəcəli "Vətənə xidmətə görə" ordeninə, 44 nəfər "Əməkdar jurnalist" fəxri adına, 17 nəfər "Əməkdar mədəniyyət işçisi" fəxri adına, 91 nəfər "Tərəqqi" medalına və 21 nəfər Azərbaycan Prezidentinin Fəxri Diplomuna layiq görülüblər. İyulun 22-də "Gülüstan" Sarayında keçirilmiş təntənəli mərasimdə mükafatlar həmin şəxslərə təqdim olunub, bundan başqa, KİV əməkdaşlarına Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu, Azərbaycan Mətbuat Şurası və ayrı-ayrı şirkətlərin qiymətli mükafatları verilib. İyulun 21-də Azərbaycan Respublikasının Prezidenti Cənab İlham Əliyev Azərbaycan Mətbuat Şurası İdarə Heyətinin üzvlərini qəbul edib və geniş nitq söyləyib. Dövlət başçısı Azərbaycan mətbuatının keçdiyi inkişaf yoluna nəzər salıb, kütləvi informasiya vasitələrinin inkişafına dövlət dəstəyi, mövcud problemlər və onların həlli ilə bağlı öz dəyərli fikirlərini bölüşüb".

Ə.Həsənov qeyd edib ki, kütləvi informasiya vasitələrinin əməkdaşları 2015-ci il noyabrın 1-də Milli Məclisə keçirilmiş seçkilərdə fəal iştirak edib, bir çox KİV nümayəndəsi öz namizədliyini irəli sürüb, onlardan 11 nəfəri Milli Məclisə deputat seçilib: "Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu kütləvi informasiya vasitələrinə dövlət dəstəyini davam etdirib, 34 redaksiyaya yüksək məbləğdə maliyyə dəstəyi ayrılıb. Bundan başqa, fond Novruz bayramı, Milli Mətbuat Günü və Yeni illə əlaqədar 3, habelə ayrı-ayrı dövlət orqanları ilə 8 fərdi jurnalist yazıları müsabiqəsi keçirib, yüzlərlə jurnalist pul mükafatlarına layiq görülüb".

Ə.Həsənov vurğulayıb ki, Azərbaycan Respublikasında kütləvi informasiya vasitələrinin fəaliyyətini tənzimləyən qanunvericilik bazası təkmilləşdirilib, ölkədə söz və məlumat azadlığının daha da inkişaf etdirilməsi, KİV-lərin müstəqilliyinin gücləndirilməsi, onların maddi-texniki bazasının möhkəmləndirilməsi istiqamətində tədbirlər davam etdirilib: "Azərbaycan Prezidentinin Sərəncamına uyğun olaraq, jurnalistlər üçün inşa edilmiş 156 mənzillik binanın sənədləşdirmə işləri başa çatdırılıb və dekabrın 24-də jurnalistlərə müvafiq özəlləşmə sənədləri təqdim edilib. Jurnalistlər üçün digər 256 mənzillik binanın tikintisi davam etdirilir. 2016-cı ilə mənzillərin jurnalistlərə verilməsi planlaşdırılır".

Prezidentin köməkçisi bildirib ki, söz və məlumat azadlığı Azərbaycanda vətəndaş cəmiyyəti quruculuğunun mühüm tərkib hissəsidir və qarşıdan gələn dövrdə də Azərbaycan dövləti KİV-lərin müstəqilliyinin gücləndirilməsi istiqamətində səylərini davam etdirəcək: "Lakin KİV-lər yaradılmış əlverişli şəraitdən sui-istifadə hallarına yol verməməli, daha peşəkar, məsuliyyətli olmalı, Azərbaycan cəmiyyətinin inkişafına, ümummilli məsələlərin həllinə dəyərli töhfələr verməlidirlər".

Sonra çıxış edən Milli Məclisin deputatı, Mətbuat Şurasının sədri Əflatun Amaşov jurnalistikanın xalqımızın milli şüurunun oyanmasında və müstəqil dövlət quruculuğunda mühüm rol oynadığını vurğulayıb.

Sonra isə müsabiqə qalibləri mükafatlandırılıb və tədbir musiqi proqramı ilə davam etdirilib.

Qeyd edək ki, "SƏS" Media Qrupunun nümayəndəsi də mükafatlandırılanlar arasında olub.

İntizarə Məmmədova