Elman Məmmədov: “DQMV-nin yenidən bərpa olunmasına ehtiyac yoxdur” AÇIQLAMA

"Hesab edirəm ki, Dağlıq Qarabağ Muxtar Vilayəti (DQMV) yenidən bərpa olunsa, burada heç bir üstünlükdən söhbət gedə bilməz". BunuSİA-ya millət vəkili Elman Məmmədov deyib.Onun sözlərinə görə, DQMV-nin yenidən bərpa olunması fikrinin tam əleyhinədir: "Çünki Azərbaycan Respublikasında 1923-cü ildə qeyri-qanuni, Azərbaycan xalqının milli mənafeyinə, iradəsinə zidd olaraq ermənilərin istəyi, rəsmi Moskvanın təşəbbüsü ilə ölkəmizin daxilində o dövrdə belə bir qondarma qurum yaradıldı. Guya ki, Azərbaycanın o regionunda ermənilər çoxluq təşkil edir və onlara muxtariyyət vermək lazımdır. Onda gərək o dövrdə Gürcüstanda yaşayan azərbaycanlılara, eləcə də Ermənistanın özündə bütün Zəngəzur, Dərələyiz, Göyçə mahalına muxtariyyət verilərdi və s. Bu lazımsız qurum 1991-ci ilin noyabrın 26-da Azərbaycan Respublikasının Ali Sovetinin qərarı ilə ləğv olundu. Hazırda ona heç bir ehtiyac da yoxdur. Azərbaycan 100-200 milyon əhalisi və çox böyük ərazisi olan bir dövlət deyil ki, onun müxtəlif yerlərində müxtəlif muxtariyyətlər, vilayətlər yaradılsın. Qətiyyən buna ehtiyac yoxdur və düzgün olaraq da ləğv olunub".

sia.az