Sağlamlığın qorunması məqsədilə maarifləndirmə işləri aparılır

Dünən Səhiyyə Nazirliyinin İctimai Səhiyyə və İslahatlar Mərkəzinin nümayəndələri Azərbaycan Milli Elmlər Akademiyasının Mərkəzi-Elmi Kitabxanasında maarifləndirmə məqsədilə təşkil olunmuş tədbirdə iştirak ediblər. Mərkəzin rəsmisi orqanizmində hormonal pozulmalar və bu sahədə görüləcək profilaktik metodlar haqda məruzə ilə çıxış edib.

Kitabxana işçiləri və digər iştirakçıların qatıldığı bu tədbir "Ana və uşaqların sağlamlığının yaxşılaşdırılmasına dair 2014-2020-ci illər üçün Dövlət Proqramı"nın həyata keçirilməsi üzrə Azərbaycan Respublikası Səhiyyə Nazirliyinin Tədbirlər Planının 7.1-ci bəndinə müvafiq olaraq reproduktiv sağlamlıq barədə maarifləndirmə işinin həyata keçirilməsi məqsədilə təşkil olunub.

Tədbir iştirakçılarına həyatın bütün mərhələlərində "Qadının reproduktiv sisteminə hormonların təsiri" və "Qalxanabənzər vəzin qadın sağlamlığında rolu" mövzuları ətrafında mühazirələr oxunub.

Qadınların sağlamlığında maarifləndirmə işinin vacib olduğunu söyləyən məruzəçilər müxtəlif yaş dövründə qadının endokrin sistemində baş verən pozulmaların səbəbləri və əlamətlərindən danışaraq, vaxtında aparılan profilaktik tədbirlərin yaranmış xəstəliyin müalicəsindən həm maddi, həm də mənəvi cəhətdən daha asan olduğunu vurğulayıblar.

Tədbirin sonunda iştirakçıların sualları cavablandırılıb və onları maraqlandıran məqamlarla bağlı diskussiyalar aparılıb.

ZÜMRÜD