Oqtay Əsədov: "Ollandın çıxışı tam tərkibdə verilməyib"

ATƏT Parlament Assambleyasının vitse-prezidenti Azay Quliyev Milli Məclisin plenar iclasında Fransa prezidenti Fransua Ollandın mövqeyini pisləyib. SİA-nın verdiyi məlumata görə, o bildirib ki, Fransa prezidenti erməni diasporunun nümayəndələri ilə keçirdiyi görüşdə Dağlıq Qarabağ münaqişəsinin həllində xalqların öz müqəddəratını təyin etməyin əsas prinsip olduğunu söyləməklə Ermənistanın tezisini təkrarlayıb: "Təəssüflər olsun ki, Fransa prezidenti bir az da qabağa gedərək Ermənistan-Azərbaycan prezidentlərinin görüşünü də təşkil edəcəyini bildirib. Fransua Olland faktiki olaraq Ermənistana dəstəyini ifadə edib. Bu, yolverilməzdir".O xatırladıb ki, Fransa bununla Dağlıq Qarabağdakı separatçılara dəstəyini ifadə edib: "Heç kim düşünməsin ki, Fransa prezidentinin səlahiyyətlərinin bitməsinə 2 ay qalmış müddətdə belə bəyanata verməsi ermənilərin könlünü almaq məqsədi daşıyır. Əsla belə deyil. Fransanın həyata keçirdiyi siyasət birmənalı şəkildə həmişə erməniləri dəstəkləməkdən ibarət olub. Təksa statistikaya baxsaq görərik ki, Azərbaycanın işğal altında olan torpaqlarına qanunsuz səfərləri daha çox Fransa vətəndaşları ediblər. Bugünkü separatçı rejimlə ən çox əlaqə quran Fransadır. Buna görə də, bu, bizi kifayət qədər narahat edir. Fransanın beynəlxalq hüquq normalarına və BMT-nin Təhlükəsizlik Şurasının qətnamələrinə açıq şəkildə hörmətsizlik etməsi cavabsız qalmamalıdır. Fransanın ATƏT-in Minsk Qrupunun həmsədrliyindən uzaqlaşdırılması elə da sadə prosedur deyil. Fransanın mövqeyinə görə diplomatik addımlar atılmalıdır. Ən azından Fransaya etiraz notası göndərilməlidir. Bizim Xarici İşlər Nazirliyi məsələyə adekvat cavab verməlidir".Daha sonra məsələ ilə bağlı Milli Məclis sədri Oqtay Əsədov fikirlərini bildirərək qeyd edib ki, Fransua Ollandın çıxışı tam tərkibdə verilməyib. "Bəzi mətbuat orqanları erməni mediasından götürüb çıxışı veriblər. Ermənilər isə o çıxışı təhrif ediblər. Ancaq sizinlə razıyam ki, Madrid prinsiplərinə istinad edərək deyib ki, xalqlar öz müqəddəratını təyin etməlidir".

sia.az