YAP Samux rayon təşkilatında "Ulu Öndər Heydər Əliyev və müasir Azərbaycan gəncliyi" mövzusunda dəyirmi masa keçirilib

Dünən YAP Samux rayon təşkilatının və Samux rayon Gənclər və İdman İdarəsinin birgə təşkilatçılığı ilə Ümimmilli Lider Heydər Əliyevin anadan olmasının 94 illiyi münasibəti ilə "Ulu Öndər Heydər Əliyev və müasir Azərbaycan gəncliyi" mövzusunda gənclərin iştirakı ilə dəyirmi masa keçirilib. Tədbiri giriş sözü ilə açan YAP Samux rayon təşkilatının sədri Gündüz Bayramov qeyd edib ki, Ulu Öndərin zəngin və möhtəşəm dövlətçilik fəaliyyətində gənclər siyasəti hər zaman xüsusi yer tutub. Azərbaycan gənclərinin günümüzün müasir, inkişaf etmiş, yüksək intellektli qüvvə kimi formalaşmasında Ulu Öndər Heydər Əliyevin böyük əvəzedilməz xidmətləri olub.

Sonra YAP Samux rayon təşkilatının gənclər birliyinin üzvləri Qurban Həsənov, Nurlana Həsənzadə, Elşən Əlizadə, Təhminə Əliyeva, Lyüdmila Bayramova və Şəbnəm Məhərrəmova cıxış edərək vurğuladılar ki, Azərbaycan gənclər ölkəsidir. "Əhalinin 66%-i gənclərdir. Elmi- texniki tərəqqinin sürətlə inkişafında gənclər öz izlərini qoyur"-deyə bildirilən çıxışlarda vurğulanıb ki, Azərbaycan gəncləri ölkəmizdə gedən mədəniyyət, incəsənət, elm və təhsil sahələrində böyük uğurla irəliləyərək, zəngin milli-mədəni irsimizin qorunub-saxlanılmasında, inkişaf etdirilməsində özünü göstərir: "Gəncləri təhsil almağa, oxumağa çağıran Ulu Öndər Heydər Əliyev öyrədirdi ki, dünyada mövcud olan bütün elmlərə yiyələnmək mümkün deyil, lakin vətənini sevən gənc mütləq iki elmi mükəmməl öyrənməlidir. Bu elmlərdən biri ana dilimiz, digəri Azərbaycan tarixidir. Bu elmləri dərin bilən gənc xalqını və vətənini çox sevəcək. Vətəni sevmədən isə onu işğaldan qurtarmaq mümkün deyil".

Tədbirin sonunda Samux rayon Gənclər və İdman İdarəsinin rəisi Rəşad Qarayev çıxış edərək bildirib ki, düşmənə qarşı barışmaz olmaq üçün Vətəni candan artıq sevmək lazımdır. "İndiki gəncliyin qarşısında əsas vəzifə - müstəqilliyimizi qorumaq, ərazi bütövlüyümüzü qorumaq və bərpa etməkdir"-deyə qeyd edən idarə rəisi sonda vurğulayıb ki, Ümummilli Lider Heydər Əliyev ideyalarının layiqli davamçısı İlham Əliyevin apardığı uğurlu daxili və xarici siyasət Azərbaycanın aydın səhərlərindən xəbər verir.

Afət TAHİRQIZI