"Paşinyanın fikirləri Düşənbədə keçirilən söhbətin ruhuna ziddir"

"Azərbaycanla Ermənistan arasında operativ əlaqə dövlət başçıları, xarici işlər və ya müdafiə nazirləri səviyyəsində qurulmayıb. Əlaqə daha aşağı səviyyədə qurulub və müvafiq çərçivələrdə operativ hallarda istifadə olunur". SİA-nın məlumatına görə, bunu Azərbaycan Prezidenti Administrasiyasının Xarici siyasət məsələləri şöbəsinin müdir müavini Hikmət Hacıyev deyib.O bildirib ki, Ermənistan və Azərbaycan münaqişə tərəfləridir və münaqişənin həlli üçün danışıqlar aparır: "Ona görə də bu təmaslar normaldır" Ermənistanın baş naziri vəzifəsini icra edən Nikol Paşinyanın separatçı rejimin münaqişənin nizamlanması ilə bağlı danışıqlarda iştirakı barədə açıqlamasını şərh edən H.Hacıyev söyləyib ki, bu, qəbulolunmaz yanaşmadır və münaqişənin həllinə xidmət etmir: "Əksinə bu, gərginliyi daha da artıran addımdır. Münaqişənin cavabdeh tərəfi Ermənistandır, çünki bu ölkə güc tətbiq edərək torpaqlarımızı işğal edib. Azərbaycanın işğal olunmuş ərazilərində erməni qoşunlarının mövcudluğu onu göstərir ki, Ermənistan cavabdeh tərəfdir. Ona görə də Ermənistan məsuliyyətdən yayına bilməz. Ermənistan qoşunlarını işğal olunmuş ərazilərimizdən çıxarmalıdır. Bu cür zərərli ritorika dövlət başçılarının Düşənbədə keçirdiyi söhbətin ruhuna ziddir".

sia.az