Məşhur Məmmədov: Azərbaycanla müqayisədə işğalçı Ermənistan pandemiya ilə mübarizədə müqayisəolunmaz dərəcədə geridə qalıb

“Azərbaycan Prezidenti İlham Əliyev iyulun 6-da Bakının Xətai rayonunda Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli hospitalının açılışından sonra yerli televiziyalara verdiyi müsahibəsində ölkədaxili və beynəlxalq auditoriyaya hesablanmış bir çox vacib mesajlar verdi. Dövlətimizin başçısı müsahibədə mühüm bəyanatlar səsləndirdi”. Bu fikirləri Milli Məclisin deputatı Məşhur Məmmədov deyib.

M.Məmmədov bildirib ki, Prezident İlham Əliyevin müsahibəsinin əsas istiqamətləri pandemiya ilə mübarizə sahəsində görülən işlər və Dağlıq Qarabağ münaqişəsinin həlli ilə bağlı Ermənistan rəhbərliyinin nümayiş etdirdiyi mövqe idi: “Cənab Prezident Dağlıq Qarabağ münaqişəsinin həlli ilə bağlı məsəslələrə də geniş toxundu. Ermənistanın hazırkı mərhələdə əsas məqsədinin danışıqlar prosesini pozmaq olduğunu bildirdi. Bu məqsədlə müxtəlif təxribatlara əl atdığını, beynəlxalq təşkilatların bu məsələyə adekvat reaksiya vermədiyini qeyd etdi. Xüsusilə ATƏT-in Minsk qrupunun mövqeyini sərt tənqid etdi. Hər iki ölkəyə münasibətdə ikili standartlara yol verildiyini xüsusi vurğuladı. Azərbaycanla müqayisədə işğalçı Ermənistan pandemiya ilə mübarizədə müqayisəolunmaz dərəcədə geridə qalıb. Dövlətimizin başçısı həmçinin Azərbaycanla müqayisədə Ermənistanda pandemiya ilə mübarizə sahəsində vəziyyətin yaxşı olmadığını, bu ölkənin hazırda pandemiyadan ən çox əziyyət çəkən ölkələrdən biri olduğunu qeyd etdi. Buna təsir göstərən amillərdən biri də Ermənistanın uzun illərdir Azərbaycana qarşı nümayiş etdirdiyi aqressiyadır. Məhz bu səbəbdən Ermənistan bir çox regional layihələrdən kənarda qalıb”.
O qeyd edib ki, müəyyən dairələr Ermənistan haqqında “demokrat obrazı yaratmağa çalışır. Bu isə yolverilməzdir. Deputat söyləyib ki, Prezident İlham Əliyevin iyulun 6-da yerli televiziyalara müsahibəsində qeyd etdiyi kimi, Ermənistanda insan haqlarının və demokratiyanın pozulması bu günün işi deyil: “Dövlətimizin başçısı bildirib ki, Ermənistanda heç vaxt demokratiya olmayıb. Ermənistan hələ müstəqil ölkə kimi formalaşandan dərhal sonra öz əsl xislətini göstərdi. Xocalı soyqırımını törədən faşistlər demokrat ola bilməzlər. Başqasının torpağına göz dikən, bir milyon insanı evsiz-eşiksiz qoyan ölkə demokrat ola bilməz. Onlar bir milyon Azərbaycan vətəndaşının və Ermənistanda yaşayan azərbaycanlıların elementar insan haqlarını pozublar. Cənab Prezidentin qeyd etdiyi kimi, ermənilərə himayədarlıq edənlər, ilk növbədə, erməni lobbisi, onun pulları, ondan sonra Ermənistan hökumətinin Avropada çirkin lobbiçilik fəaliyyəti onları həmişə bu tənqiddən qoruyurdu. Əslində, bu, lobbiçilik fəaliyyəti deyil, bu, korrupsiya fəaliyyətidir”.
Millət vəkilinin sözlərinə görə, Prezident İlham Əliyevin qeyd etdiyi kimi, Ermənistanın BMT Baş Assambleyasının xüsusi sessiyasının keçirilməsi təşəbbüsünün əleyhinə səs verməsi bu ölkənin iç üzünü və mahiyyətini bir daha açdı. Əslində pandemiyadan ən çox zərər çəkən ölkələrdən biri kimi Ermənistan BMT Baş Assambleyasının keçirilməsində maraqlı olmalıydı. Bu qərəzli yanaşmanın kökündə bu ölkədə hökm sürən və dövlət tərəfindən təbliğ edilən Azərbaycanafobiyadır, Azərbaycan dövlətinə, Azərbaycan xalqına nifrətin təzahürüdür.
“Bu təşəbbüsü irəli sürməkdə Azərbaycanın məqsədi COVİD-19-la mübarizədə vahid yanaşmanın tətbiqinə, ölkələrin özlərinə qapanmamasına, inkişaf etmiş ölkələrin ağır vəziyyətdə olan ölkələrə kömək göstərməsinə nail olmaq idi. Bu təşəbbüsün reallaşması üçün 97 səs lazım olmuş, ancaq 130-dan çox ölkənin səsi əldə edilmişdi. Burada iki əsas məsələ öz rolunu göstərdi - bu mövzunun aktuallığı və beynəlxalq müstəvidə Azərbaycana olan dəstək və rəğbət. Azərbaycan bu rəğbəti uzun illər həyata keçirdiyi ardıcıl xarici siyasət hesabına, prinsipial, müstəqil mövqe sayəsində qazanıb. Bu, doqquz il bundan əvvəl 155 ölkənin dəstəyi ilə BMT Təhlükəsizlik Şurasına üzv seçilən Azərbaycana yenidən verilən böyük beynəlxalq dəstəkdir, ölkəmizə olan inam və etimadın göstəricisidir”-deyə, M.Məmmədov qeyd edib.

yap.org.az