YAP və AK Parti nümayəndələrinin iştirakı ilə konfrans keçirilib

Gəncədə Türkiyə Cümhuriyyəti Ədalət və İnkişaf Partiyası (AK Parti) sədrinin birinci müavini Numan Kurtulmuşun başçılıq etdiyi nümayəndə heyətinin iştirakı ilə "Şuşa Bəyannaməsi: milli-mənəvi dəyərlərimizə sadiqlik və gələcək əməkdaşlıq üçün yeni çağırışlar” mövzusunda konfrans keçirilib. SİA-nın yerli bürosunun məlumatına görə, Heydər Əliyev Mərkəzində keçirilən konfransı giriş sözü ilə Gəncə şəhər İcra Hakimiyyətinin başçısı Niyazi Bayramov açaraq qonaqları salamlayıb.Əvvəlcə Vətən müharibəsində şəhid olanların xatirəsi 1 dəqiqəlik sükutla yad edilib. İH başçısı çıxışında qeyd edib ki, tarixən dostluq, qardaşlıq münasibətləri ilə dünya ölkələri üçün nümunə olan Azərbaycan və Türkiyə bu gün də öz ənənəsinə sadiq qalır: “Türkiyə Cümhuriyyətinin qurucusu Mustafa Kamal Atatürkün “Azərbaycanın sevinci bizim sevincimiz, kədəri bizim kədərimizdir” və Azərbaycan xalqının Ümummilli Lideri Heydər Əliyevin “Bir millət, iki dövlət” ifadələri xalqlarımızın birliyini milli-mənəvi dəyərlər müstəvisində təmin edir”.Qeyd olunub ki, dövlətlərimiz arasındakı münasibətlər bu gün hər iki ölkə rəhbərliyi tərəfindən həyata keçirilən məqsədyönlü siyasətin məntiqi nəticəsi olaraq daha yüksək səviyyəyə çatmaqda, bir sıra sahələr üzrə isə keyfiyyətcə yeni müstəviyə keçməkdədir.Daha sonra tədbirdə Türkiyənin hakim Ədalət və İnkişaf Partiyasının (AK Parti) sədrinin birinci müavini Numan Kurtulmuş çıxış edib: “Bu gün qardaş Azərbaycanda, qazi şəhər Gəncə şəhərindəyik. Bundan sonra da Türkiyə və Azərbaycan qardaşlığı davam edəcək. Azərbaycan Prezidenti cənab İlham Əliyev və Türkiyə Prezidenti cənab Rəcəb Tayyib Ərdoğanın Şuşa görüşü, habelə 15 iyun 2021-ci il tarixində imzalanan Şuşa Bəyannaməsi bu münasibətlərin mühüm tarixi mərhələsidir”.Numan Kurtulmuş bildirib ki, indiyədək bütün məsələlərdə bir yerdə olan Türkiyə və Azərbaycan bundan sonra da bir yerdə olacaq: “Bu birgəlik əzmi 15 iyunda Şuşa Bəyannaməsi ilə daha da əzəmətli oldu. Qardaşlığımız əbədi, bayraqlarımız uca olsun!”AK Parti sədrinin birinci müavini onu da deyib ki, ermənilər 30 il ərzində Azərbaycanın işğal altında olan torpaqlarını viran qoyublar, bu, insanlığa sığmayan bir hərəkətdir. O, 44 günlük Vətən müharibəsi zamanı Ermənistanın Gəncə şəhərini, dinc insanları raket atəşinə tutmasının da insanlığa qarşı hərəkət olduğunu deyib, həlak olanlara rəhmət diləyib.

***
Gəncədə Türkiyə Cümhuriyyəti Ədalət və İnkişaf Partiyası (AK Parti) sədrinin birinci müavini Numan Kurtulmuşun başçılıq etdiyi nümayəndə heyətinin iştirakı ilə "Şuşa Bəyannaməsi: milli-mənəvi dəyərlərimizə sadiqlik və gələcək əməkdaşlıq üçün yeni çağırışlar” mövzusunda konfrans başlayıb. SİA-nın yerli bürosunun məlumatına görə, konfrans Heydər Əliyev Mərkəzində keçirilir.Tədbirdə AK Parti sədrinin I müavini Numan Kurtulmuş və YAP Sədrinin müavini-Mərkəzi Aparatın rəhbəri Tahir Budaqov iştirak edir.Əvvəlcə qonaqlar mərkəzdə Ümummilli lider Heyder Əliyevin abidəsini ziyarət edib, qarşısına gül dəstələri qoyublar.Konfransdan sonra AK Parti sədrinin I müavini Numan Kurtulmuşun və YAP Sədrinin müavini-Mərkəzi Aparatın rəhbəri Tahir Budaqovun iştirakı ilə səfərin yekunlarına dair mətbuat konfransı keçiriləcək.Qeyd edək ki Türkiyə Cümhuriyyəti Ədalət və İnkişaf Partiyası sədrinin birinci müavini cənab Numan Kurtulmuşun başçılıq etdiyi nümayəndə heyəti ötən gündən Gəncə şəhərinə rəsmi səfərdədir. Qonaqlar Gəncədə Ermənistanın raket hücumlarının səbəb olduğu cinayət səhnələri ilə (Qələbə parkı) tanış olublar.Sonra isə İmamzadə Dini Kompleksi və Nizami Gəncəvi Məqbərə Kompleksini ziyarət ediblər.

sia.az