Siyasət

  • 1 677

Azərbaycan Avropa dövlətləri üçün önəmli ölkədir

image

“Bolqarıstan-Azərbaycan əlaqələri çoxşaxəli əlaqələrdir. Xalqlarımız arasındakı tarixi bağlar, əlbəttə ki, bu əlaqələrin təməlində dayanan mühüm amildir. Bu gün, əlbəttə ki, qarşılıqlı maraqlar üzərində qurulmuş o strateji tərəfdaşlıq yeni imkanlar açır. Çünki enerji sahəsində başlanılan çox ciddi əməkdaşlığın çox böyük gələcəyi var. Azərbaycan etibarlı qaz təchizatçısı kimi Avropa ölkələri üçün önəm daşıyan ölkədir. Bizim üçün də Avropa bazarı, o cümlədən Bolqarıstan və Sizin qonşu ölkələrin bazarları böyük maraq kəsb edir” Dövlət başçısı İlham Əliyevin sentyabrın 30-da Bolqarıstana rəsmi səfəri zamanı keçirdiyi görüşlərdə səsləndirdiyi bu fikirlər hazırkı dövrdə Azərbaycanın dünyanın enerji təhlükəsizliyinin təminatına verdiyi töhfələrə işıq salır və perspektivləri açıqlayır.

Gerçəkləşdirdiyi layihələrlə dövlətlər, xalqlar arasında körpü rolunu daha da möhkəmləndirən Azərbaycan etibarlı tərəfdaş kimi nüfuz qazanır, çoxtərəfli əməkdaşlığın təşəbbüsçüsü və onları gerçəkləşdirən ölkə kimi tanınır. “Əsrin müqaviləsi”nin 20 illiyində Cənub Qaz Dəhlizinin təməlinin qoyulması, 23 illiyi ərəfəsində “Yeni əsrin müqaviləsi”nin imzalanması, 2018-ci ildə Cənub Qaz Dəhlizinin rəsmi açılışının olması Azərbaycanın beynəlxalq nüfuzunun göstəricisidir. Regional əməkdaşlığın aparıcı qüvvəsinə, dünyanın enerji təhlükəsizliyinin təminatçısına çevrilən Azərbaycan daim yeni-yeni layihələrin gündəmə gətirilməsinə və icrasına səy göstərir. Təbii ki, bu da ölkəmizin beynəlxalq əməkdaşlığa verdiyi önəmdən, təcrübə mübadiləsinə artan marağından irəli gəlir.
Azərbaycanın dünyanın enerji təhlükəsizliyinin təminatında rolu günbəgün artır. Bu il Azərbaycan ilə Avropa İttifaqı arasında imzalanan “Avropa Komissiyası tərəfindən təmsil olunan Avropa İttifaqı ilə Azərbaycan Respublikası arasında enerji sahəsində Strateji Tərəfdaşlığa dair Anlaşma Memorandumu” da deyilənlərin təsdiqidir. Prezident İlham Əliyev və Avropa Komissiyasının Prezidenti xanım Ursula Fon der Lyayenin imzaladıqları Anlaşma Memorandumu Azərbaycanla Avropa İttifaqı arasında enerji sahəsində strateji tərəfdaşlığın gələcəyi üçün yol xəritəsidir. Bolqarıstana səfəri çərçivəsində Prezidentlərin mətbuata bəyanatlarında cənab İlham Əliyev diqqəti bu sənədə yönəldərək bildirdi ki, bu Memoranduma əsasən, növbəti bir neçə ildə Avropaya qaz ixracatımızı ən azı 2 dəfə artıracağıq və buna imkan var: “Azərbaycanın təsdiq edilmiş qaz ehtiyatları 2,6 trilyon kubmetrdir. Yeni və çoxşaxəli qaz nəqliyyat infrastrukturu bizə imkan verir ki, bir çox ölkələri təbii qazla təmin edək. Əlbəttə ki, bu sahədə əldə edilmiş uğurlar gələcək planlar üçün də gözəl zəmindir.”
Bu mühüm məqamı da qeyd edək ki, səfər zamanı görüşlərdə SOCAR-ın Bolqarıstanda ofisinin açılması məsələsi də geniş müzakirə edildi. “Biz enerji sahəsində təkcə təbii qazın ixracı ilə işimizi bitmiş hesab etməməliyik” söyləyən dövlət başçısı İlham Əliyev vurğuladı ki, enerji ilə bağlı olan digər məsələlər müzakirə olundu. Elektrik enerjisinin ixracı və bu sahədə qarşılıqlı faydalı əməkdaşlıq, xam neftin Bolqarıstan istiqamətinə nəqli, Bolqarıstanda enerji infrastrukturunun yenilənməsində SOCAR-ın mümkün iştirakı və digər məsələlər günün aktual məsələləri kimi diqqətdə oldu. SOCAR-ın Bolqarıstandakı ofisinin açılması vaxtı artıq çatıb.
Atılan hər bir addım, gündəmə gətirilən hər bir məsələ Azərbaycanın etibarlı tərəfdaş kimi artan nüfuzunun təqdimatıdır. Dövlət başçısı İlham Əliyevin Yunanıstan-Bolqarıstan Qaz İnterkonnektorunun (IGB) açılış mərasimində iştirakı, həmçinin çıxışı da bunun bariz nümunəsidir. “Yunanıstan-Bolqarıstan Qaz İnterkonnektoru layihəsi doğrudan da tarixi əhəmiyyətə malikdir” bildirən cənab İlham Əliyev belə bir əminliyi də ifadə etdi ki, bu interkonnektor həm Azərbaycan qazının Avropaya daha geniş miqyasda nəql olunmasına imkan verəcək, eyni zamanda, Avropa qitəsində enerji təhlükəsizliyinə də bunun çox böyük faydası olacaq.
Avropa İttifaqı ilə Azərbaycan arasında enerji dialoqunun yaranması ilə neft və qaz sahələri ilə yanaşı, elektrik enerjisi, bərpaolunan enerji, hidrogen və enerjinin səmərəliliyi məsələləri də gündəmdədir. Ölkəmizdə bu sahəyə də böyük diqqət göstərilir. Dövlət başçısının Bolqarıstan səfəri bu məsələlərin müzakirəsi baxımından da çox faydalı oldu.

Anar Nəbiyev
YAP Qazax rayon təşkilatının sədri

Digər xəbərlər