“Azərbaycanda radikal müxalifətin birlik yaratması heç vaxt mümkün olmayacaq”

Azərbaycanın radikal müxalifətinin birlik yaratması heç vaxt mümkün olmayacaq. Bunu cümə günü Trend-ə Azərbaycan Sosial Demokrat Partiyasının (ASDP) həmsədri Araz Əlizadə bildirib.

"Bu insanlar vaxtilə Xalq Cəbhəsində (AXC) olublar. AXC-dən şəxsi ambisiyalarına görə ayrılıblar. Onların ayrılmaları ideoloji zəmində deyil, şəxsi ambisiyalar zəminində olub. Onlar şəxsi ambisiyalarını heç vaxt təmin edə bilməyəcəklər, ona görə də heç zaman birləşməyəcəklər", - Əlizadə əlavə edib.

ASDP həmsədri hesab edir ki, Azərbaycanın radikal müxalifət partiyaları əslində birləşməyə cəhd göstərmirlər. Onlar birləşmə görüntüsü yaratmaqla insanları aldadırlar.

"Elə görüntü yaradırlar ki, guya iş görürlər, lakin özləri anlamırlar ki, onlar artıq siyasətdə yoxdurlar. Onlar fiziki cəhətdən mövcuddurlar", - Əlizadə vurğulayıb.

Onun sözlərinə görə, Azərbaycanda demokratiyaya ən çox indi radikal müxalifət mövqeyi tutan partiyalar zərbə vurublar.