İsa Qəmbərov sədr postunda qalmaq istəyir

Rauf Arifoğlu:

Ürəyimiz ətdir, deyildir dəmir,

Ay İsa, sən onu üsullu gəmir,

Bu İsa heç zaman qopmaq istəmir,

Möhkəm yapışdığı başqan postundan.

İsa Qəmbərov:

Ya onu eksport bir tavar edim,

Mümkün, Müsavatı hətta bar edim,

Yerimi sənəmi etibar edim?

Axı cana doydum sənin tostundan.

Rauf Arifoğlu:

Qəbuledilməzdi İsanın şərti,

Sədrlikdə qalır, mövqeyi qəti,

Qərbliyə bənzəyir siri-sifəti,

Xarici təmayül yağır "QOST"-undan.

İsa Qəmbərov:

Gəlməmiş siyasi trup xoşuma,

Nə də ki, namizəd qrup xoşuma,

Heç zaman gəlməyib Rauf xoşuma,

Bir iz də qalmayıb qoşa çustundan.

Rauf Arifoğlu:

İsa kərəntisi boss pulu biçmir,

İndi boğazdan da adi su keçmir,

Qurultay keçirər? Gözüm su içmir,

Nə də xoşum gəlmir İsa mostundan.

İsa Qəmbərov:

Olsun on barmağı Raufun ağ şam,

Çox yemək vermişəm mən səhər-axşam,

Raufa ciddi göz ağartmamışam,

Məndən pisi çıxar onun rastından.

Rauf Arifoğlu:

Qərbdən nə alsa da, heç ona yetməz,

Bu bəyin bağında xoşbəxtlik bitməz,

İsa heç bir kəsə güzəştə getməz,

Nə bu Müsavatda, "İP"-də çastından.

İsa Qəmbərov:

Siyasi xətti də bir qaravəlli,

"Yeni Müsavat"dan tutub dördəlli,

Raufun naməlum mövqeyi bəlli,

Özü üz döndərdi mən tək dostundan.

Rauf Arifoğlu:

Siyasət başqanın heç yolu deyil,

Adı İsa bəydi, o, Bolu deyil,

Başının içi də heç dolu deyil,

Hitlerə çəkibdi zalım rostundan.

İsa Qəmbərov:

Əli mürəbbəmdə, turşumda əvvəl,

Birinci olardı marşımda əvvəl,

Farağat durardı qarşımda əvvəl,

İndi od püskürür mənə pastından.

Rauf Arifoğlu:

Düşmənə yalvarır, dosta yalvarır,

Pul üçün hətta Qrossa yalvarır,

Onun "Humayun"u bossa yalvarır,

Bir nalə çıxmaqda İsa "Rast"ından.

İsa Qəmbərov:

Başına qoymamış indiyədək fəs,

Dediyini deyər, lap başını əz,

Qoynuna ilan sal, narıncı sevməz,

At da rəng götürər Rauf mastından.

Rauf Arifoğlu:

İsanın məkrinə dözmüşük, bəsdi,

O gəldi, üstümdən qara yel əsdi,

Son illər İsa bəy qaradinməzdi,

Çıxmaz xoş ifadə, əsla, ustundan.

İsa Qəmbərov:

Həmişə göstərib özünü üstün,

Hirslənim, təpəmdən çıxsın öz tüstüm,

Şübhəli-şübhəli çıxırdı o gün,

Boylana-boylana Rauf "qastin"dən.

Rauf Arifoğlu:

Heç özü də bilmir neyləyir, İsa,

Çox avam yetkili teyləyir İsa,

"Sem"indən pisəmsə, söyləyir İsa,

Yaxşıyam liderin "pyat", "şest"indən.

İsa Qəmbərov:

Qurumda təfriqə salmaq istəyir,

Qrantı şəxsən o, almaq istəyir,

Müsavat başqanı olmaq istəyir,

Tezliklə partlayar Rauf şəstindən.

Rauf Arifoğlu:

İsanın o yekə ağzı körük ki,

Başlara o qədər düyün hörüb ki,

O qədər şər-xata işlər görüb ki,

İstər məsuliyyət düşsün üstündən.

İsa Qəmbərov:

İstərdim Qərb deyə sarışın mənə,

Nə siz namizədlər qarışın mənə,

Nə ziyan gətirməz barışın mənə,

Nə də xeyir görəm sənin küstündən.

Rauf Arifoğlu:

Bosslara dediyi tostu əlində,

Onun həm düşməni, dostu əlində,

İstər daim tuta postu əlində,

Keçmək asan deyil İsa testindən.

İsa Qəmbərov:

Hər yeni namizəd danışır boş-boş,

Xoş olur, atanda nərddə də zər xoş,

Sədr sərxoşları Rauf tək sərxoş,

Bezməz beləsinin adam, məstindən.

Rauf Arifoğlu:

İsa bir ilandı, Əli bir ilan,

Sədrlik yolları maniə, dalan,

Xariclə qurmaqda məkrli plan,

Çətin xilas olmaq bunun qəsdindən.

İsa Qəmbərov:

Gah başı göründü, tamam yox oldu,

Qəlbində hamıya inam yox oldu,

Gah qaçdı-qayıtdı, gah tam yox oldu,

Gözüm su içmədi Rauf jestindən.

Mirzə QƏRƏNFİL