"İP" yaxşıdır, yoxsa "ACP"?

Qabil Hüseynli:

Rəsul görməyibdi belə tənəzzül,

Çevirib Rəsulu külə tənəzzül,

Qurum etməyibdi hələ tənəzzül,

"Palata"nın geniş dalanları var.

Sülhəddin Əkbər:

Onun əllərində dillənir kaman,

İstedad bəxş edib bu şəxsə zaman,

O öz əllərilə yazıb üç roman,

Rəsul dönüb olub güclü bir yazar.

Qabil Hüseynli:

Rəsulun adicə hayı-küyü var,

Başqan siyasətçi, həm biliyi var,

İsanın da yaxşı alimliyi var,

Elmi əsərlərə açıbdı bazar.

Sülhəddin Əkbər:

İsalar, Əlilər azarlar hər gün,

Üzlərə bağlanar bazarlar hər gün,

Qapısını döyür yazarlar hər gün,

Bu cür görüşlərdən o olub bezar.

Qabil Hüseynli:

Onun bircə dənə əsəri yoxdu,

Zəhmət çəkməkdə də qan-təri yoxdu,

Romanlarının da kəsəri yoxdu,

Rəsul məchulluqda yolunu azar.

Sülhəddin Əkbər:

İsanın yatağa həbi gəlibdi,

Rəsul Xızır gəlib, Nəbi gəlibdi,

Onun istedadı, təbi gəlibdi,

İsa niyyətini Yaradan pozar.

Qabil Hüseynli:

Bütün Qərb İsaya dayı qalıbdı,

Bosslarda hələ çox payı qalıbdı,

Onun hayı gedib, vayı qalıbdı,

Rəsulun yolunu gözləyir məzar.

Sülhəddin Əkbər:

Onun boğazına salınar çatı,

Artıq yarı yolda büdrəyir atı,

Günbəgün azalır elektoratı,

Tale İsaya da dar qəbir qazar.

Qabil Hüseynli:

Xoşuma gəlmədi bu yalançı takt,

İstəsən bağlaya bilərəm mən akt,

İstedad olmayıb Rəsulda heç vaxt,

Mənbələr də bunu yalana yozar.

Sülhəddin Əkbər:

"İP"-in mələməkdə boz keçi kimi,

Onun romanları qoz içi kimi,

Rəsul çox məşhurdu yazıçı kimi,

Siyasi meydanda o, əsil Sezar.

Qabil Hüseynli:

Bir zövq də almadın ilham pərindən,

O bir yazar deyil, düşün dərindən,

Rəsulun yalançı fitnələrindən,

Qoy özü qızarsın, sənsə az qızar.

Sülhəddin Əkbər:

Həm faktik işləyən diridə qalır,

Sükan İsa kimi iridə qalır,

"ACP" "İP"-dən də geridə qalır,

Mənim üstümə də xeyli az bozar.

Qabil Hüseynli:

Az aldan Rəsulun yalan səsinə,

Son anda döyərsən möhkəm dizinə,

Göz qoyub Əlinin layihəsinə,

"İP"-də İsa böyük planlar cızar.

Sülhəddin Əkbər:

Onun istedadı coşqun bir seldir,

Rəsul siyasətdə tək vuran əldir,

Əli də bu yöndə şou düzəldir,

İsanın özü də yalandan qızar.

Qabil Hüseynli:

Ciblərinə qrant axmadı deyə,

Bosslar ona yaxşı baxmadı deyə,

Siyasətdən bir şey çıxmadı deyə,

Rəsulun qarnını alıbdı azar.

Sülhəddin Əkbər:

İstər kömək etsin qan qardaşına,

Vaxtı fötə vermir Rəsul boşuna,

Elə ki, istedad vurur başına,

Yazarlar bağına eyləyib güzar.

Qabil Hüseynli:

Yazarıq biz "İP"-in bərəkətindən,

İsa çıxarıbdı onu çətindən,

Rəsulun ən çirkin hərəkətindən,

Qorxmursanmı bizə məlumat sızar.

Sülhəddin Əkbər:

Rəsulu tanıyar hər ölkə, qitə,

Daxili didişmə çətin ki, bitə,

"İP"-də mütaliə pis səviyyədə,

Sizin qərargahı ot-encər basar.

Qabil Hüseynli:

Rəsul bəyənilmir ölkədə heç də,

Yoxdu səriştəsi siyasi işdə,

"İP"-də yetkililər əlləri döşdə,

İsaya, Əliyə çox qulaq asar.

Sülhəddin Əkbər:

İsa adlandırır özünü şaman,

Əlinin qaşları çatılıb yaman,

Rəsul təşəxxüslə yeriyən zaman,

İsa ilə Əli kənardan pusar.

Qabil Hüseynli:

Bir naşılıq yığar onun üzündən,

Hər cür bədxahlığı gələr gözündən,

Çox yalan uydurub Rəsul özündən

Odur ki, tezliklə laxta qan qusar.

Sülhəddin Əkbər:

Bizim "ACP"-də müsbət durumdu,

Önünüzdə dərin bir uçurumdu,

Onsuz da faydasız adi qurumdu,

"İP"-in dövrəsində ucaldın hasar.

MİRZƏ QƏRƏNFİL