Rəsul Quliyev "İP"-in daxilində təxribatçıların olduğunu bildirir

Rəsul Quliyev:

Şərçi bədxahları məhv etsin Qədər,

Çoxu da vaxtını keçirir hədər,

"İP"-də təxribatçı kifayət qədər,

Mənə deməyin ki, yalan deyirəm.

Ərəstun Oruclu:

Saxla təpən üstdə sıx duman-çəni,

Özünə yük eylə qəmi-qüssəni,

Arzu edirəm ki, a Rəsul, səni

Çalsın zəhərli bir ilan deyirəm.

Rəsul Quliyev:

Lider cəlb edilib həmin sıradan,

Pərdə götürülüb təmiz aradan,

Təxribatçılardı qrup yaradan,

"İP"-də formalaşıb klan deyirəm.

Ərəstun Oruclu:

Mən "İP"-in üzvüyəm, bilməyən sən tək,

Bilinir qurumda uçanda milçək,

Təxribatçı varsa, adlarını çək,

Mən sənə təfriqə salan deyiləm.

Rəsul Quliyev:

Adi "İP" üzvüsən, danışma, kiri,

Hamısı satqındı ölü, ya diri,

Təxribatçı çoxdu, onların biri

Filankəsin oğlu filan deyirəm.

Ərəstun Oruclu:

Özün dopdolu bir viskili camsan,

Siyasi meydanda cahil, avamsan,

Özün təxribatçı, bədxah adamsan,

Səni orda çapıl, talan deyirəm.

Rəsul Quliyev:

Səni diri tutub, bizlə dələrəm,

Sədr olmaq üçün zildən mələrəm,

Vaxt olan mən "İP"-ə başçı gələrəm,

Baş tutar, inşallah, plan deyirəm.

Ərəstun Oruclu:

Sən gəlsən, çatarsan "İP"-in külünə,

Ehsan da verərik sənin ölünə,

Burda rəqs edirik "Heyvagülü"nə,

Sənə nahaq xaric çalan deyirəm.

Rəsul Quliyev:

Bir bədxah hələ də qaş alıb gedir,

Hər biri əlinə daş alıb gedir,

"İP"-də təxribatlar baş alıb gedir,

Sözü təkrar-təkrar, kalan deyirəm.

Ərəstun Oruclu:

Dostların önünə ağır tir salan,

"İP"-in daxilinə çirk, pas, kir salan,

Sənə kişnəyərək hay-həşir salan

Day-dayça deyirəm, qulan deyirəm.

Rəsul Quliyev:

Pul uman "İP"-çilər haram söyləyir,

O yandan Əli də dram söyləyir,

İsa Paris deyir, Aram söyləyir,

Mən yazıq Lüksemburq, Milan deyirəm.

Ərəstun Oruclu:

Çarəsiz sən idin gözünü döyən,

Olubsan o tayda özünü öyən,

Keçirib at kimi ağzına yüyən,

Belinə qoyardım palan deyirəm.

Rəsul Quliyev:

İşlə təxribatçı o yara ilə,

Gözə də kül üfür avara ilə,

"İP"-ə başçı olsam, pul-para ilə

Yardım edər Tehran, Gilan deyirəm.

Ərəstun Oruclu:

Bir ad da çəkmirsən, sözlərin boyat,

Təxribat olanda bizləri oyat,

Hələ ki, olmamış "İP"-də təxribat,

Budur olacaqlar- olan deyirəm.

Rəsul Quliyev:

Təxribat dərmanı zəhər aşında,

Cəmi təxribatçı "İP"-in tuşunda,

Əli, İsa durub sənin başında,

Sənə təxribatçı oğlan deyirəm.

Ərəstun Oruclu:

Elə başın kimi boşalıb tabaq,

Az-çox iş görürdün minnətsiz qabaq,

Artıq tökülməkdə vurduğun suvaq,

Kələ-kötür olub malan deyirəm.

Rəsul Quliyev:

Arabir çay da ver baldan İsaya,

Söykən Qərb arxalı daldan İsaya,

Gözlərinə baxıb aldan İsaya,

Əlinin başına dolan deyirəm.

Ərəstun Oruclu:

Bir baman suvaq var üz qırışında,

Ağ tüklər artıbdı sənin başında,

Yorğalıq edirsən qoca yaşında,

Sənə mən qüssədən solan deyirəm.

Rəsul Quliyev:

Qrantlar yeyilib alın tərində,

Liderin iş görür həndəvərində,

Qaxıl öz yerində, qal öz yerində,

Bəyanat verirəm, elan deyirəm.

Ərəstun Oruclu:

Sovet dönəmində neft pulu tıxdın,

Yalandan gurladın, guya ki yağdın,

Demə ki xaricdə güc-qüvvə yığdın,

Tamam tükənibdi "sila"n deyirəm.

Rəsul Quliyev:

Qoca olsaq belə siyasətbazıq,

Özün öz dilinlə demisən: qazıq,

Qan qusdun liderlər əlindən, yazıq,

Sənə dərdi-qəmi bulan deyirəm.

Ərəstun Oruclu:

Təkrar söyləyirəm, öz yerində qal,

Yaraşmaz bu gündə sənə qalmaqal,

Qocasan, qalmayıb bədənində hal,

Sənə "get o tayda sulan" deyirəm.

Mirzə QƏRƏNFİL