"İP" xülyalardan perspektiv planlar qurur

Gülağa Aslanlı:

Bizim sıramızda əsil kişi çox,

Əlinin, İsanın azı dişi çox,

"İP"-in, Müsavatın vacib işi çox,

Özünə çəkməkdə bizi, seçkilər.

Qiyas Sadıxov:

Əl götürməlisiz nə qədər şərdən,

Dönüb dosta baxın, sevinclə hərdən,

Əsla qaçmamalı Pənah nəzərdən,

Pənahsız üzərdi sizi, seçkilər.

Gülağa Aslanlı:

"İP" yaxşı, min əsrar görmüşük onda,

Bir sözü həmişə demişik sonda,

Şər iş alınmadı "Eurovision"da,

Çatacaq bədnamlıq közü, seçkilər.

Qiyas Sadıxov:

AXP lideri əzmkar, mətin,

Onsuz çox olardı "İP" əziyyətin,

İşiniz Pənahsız olacaq çətin,

Soxar "İP"-inizə bizi, seçkilər.

Gülağa Aslanlı:

Boss bizi saxlayar almaz içində,

İsa-Əli batsa lap yas içində,

Əgər olsaq belə çirk-pas içində,

İtirər ən bədnam izi, seçkilər.

Qiyas Sadıxov:

Pənahın Qərbdə də yeri sıcaqdı,

Narıncı paltar da aldıracaqdı,

Xaric də taksanı qaldıracaqdı,

Olacaq qazancın gözü, seçkilər.

Gülağa Aslanlı:

"İP"-in iclasında eləmişik qət,

Bizimçün heç zaman olmayacaq hədd,

Edərik İsanı vahid namizəd,

Ağardar bənizi, üzü, seçkilər.

Qiyas Sadıxov:

Necə məntiqsizdir Allahsız uğur,

Şefim qazandırdı günahsız uğur,

Qazanmazsınız siz Pənahsız uğur,

Olmaz xeyrinizə, düzü, seçkilər.

Gülağa Aslanlı:

Doğrudur, uğursuz on üçüncü il,

Mümkün ki, o, heç də bizim il deyil,

Yüksəkdə dayanar rəmzi qərənfil,

Götürər narıncı bezi, seçkilər.

Qiyas Sadıxov:

Uğursuz illəri bir-bir sayın bir,

Nə olsun bosslar çox, sənin dayın bir,

Nə günə düşdünüz, xatırlayın bir,

Pənahsız keçəndə bəzi seçkilər.

Gülağa Aslanlı:

Bir AXP ilə meydanda təksiz,

Bəlkə deyəcəksən qadir fələksiz,

Cəlb edər İsanı, Əlini, şəksiz,

İstisnasız hal tək özü, seçkilər.

Qiyas Sadıxov:

Zirvəyə aparar hər fərdi Pənah,

Silərdi ürəkdən hər dərdi Pənah,

Sizə ideyalar verərdi Pənah,

"İP"-ə verməyəcək mizi, seçkilər.

Gülağa Aslanlı:

Təcrübə qazandıq maketdən sonra,

Möhtəşəm, həm azman paketdən sonra,

Bizim əzəmətli piketdən sonra,

Bürüyər çəməni-düzü, seçkilər.

Qiyas Sadıxov:

"İP"-də hazırlaşın daha ağıra,

Çətin bosslar sizi önə çağıra,

İnanma Pənahsız sizi uğura

Aparardı geci-tezi, seçkilər.

Gülağa Aslanlı:

Boss qəbul edəcək iti hücumu,

Biz inkar edirik kötü hücumu,

Görəndə bizlərdən qəti hücumu,

Sözsüz, qatlayacaq dizi, seçkilər.

Qiyas Sadıxov:

Kənardan baxarsız siz matdım-matdım,

Son illər yüz dəfə yuxumu qatdım,

"İP" atmamalıdı Pənahsız addım,

Sizə bəxş eyləyər pisi, seçkilər.

Gülağa Aslanlı:

Bossun qrantını alarıq qəti,

Qızarmır qurumda üzlərin əti,

Əsla, döndərmərik padoş sifəti,

Sürtsə çöhrəmizə hisi, seçkilər.

Qiyas Sadıxov:

Seçkiyə gedəndə baxma ardına,

Namizəd olanı, yamanla, qına,

Əlbəttə, vuracaq qulaqardına,

Hər cürə hay-küyü, səsi, seçkilər.

Gülağa Aslanlı:

Mənim sözlərimi anla rədd kimi,

Şefinin uğuru gəlir bəd kimi,

Qəbul etməyəcək namizəd kimi,

Sizlərdən, vallah, heç kəsi, seçkilər.

Qiyas Sadıxov:

Pənah AXP-də azman dağ kəli,

Ondan geri qalır İsayla Əli,

Onlara dəyməsə Pənahın əli,

Qızıla çevirməz misi, seçkilər.

Gülağa Aslanlı:

Həmişə diqqət ver səbirlə sona,

Pənahı salacaq min cürə dona,

Xahiş eyləyirəm, gülərsən ona,

Alarsa başından fəsi, seçkilər.

Qiyas Sadıxov:

Xarab məmulatdan məhsul edilməz,

Sizin namizədlər məqbul edilməz,

İsa ilə Əli qəbul edilməz,

Sizlərdən gözləyər Məsi, seçkilər.

Mirzə QƏRƏNFİL