ADP-AMİP "platforma" yaradır

Sərdar Cəlaloğlu:

Birgə qısnayarıq "İP"-i dara da,

Xaricdən alarıq çoxlu para da,

İşarə vurmuşam Etibara da,

Gündəmdə AMİP-lə birləşmək durur.

Etibar Məmmədov:

Sərdar da İsanın abrını bükər,

Güc yetsə, "İP"-də də sınardı təkər,

"Güc Platforması" yaratsaq əgər,

Bundan, sözsüz ki, biz duyardıq qürur.

Sərdar Cəlaloğlu:

Qurumda qalmayıb güc bircə çəngə,

"İP"-də bu adamlar verməkdə əngə,

İsadan, Əlidən gəlmişəm təngə,

Qəlbim Etibarla indi bir vurur.

Etibar Məmmədov:

Birləşsək, bizlərdə olacaq meydan,

Sərdar göz vurarsa, dolacaq meydan,

"İP"-ə get" söyləyir bir dəli şeytan,

ADP-yə doğru aparır şüur.

Sərdar Cəlaloğlu:

"Platforma" ilə yurdu bürüyək,

Pul üçün eyhamla bossa hürüyək,

İstərdim yıxandan sonra sürüyək

"İP"-i... Etibar da hələ bir sorur.

Etibar Məmmədov:

"Palata"nın yeri ancaq dalan, dib,

Onun liderləri bağışlanmaz tip,

İndi "platforma" daha münasib,

"İP"-in rəzilliyi adamı yorur.

Sərdar Cəlaloğlu:

Biz hazır kütlənin xeyir-şərində,

"İP" üzdə, "GP"-miz daha dərində,

Həmkarlar "palata" həndəvərində,

Bu onun, o bunun puçunu burur.

Etibar Məmmədov:

"Palata" kənarda qaldı azarla,

Əlaqəmiz çoxdu pulla, bazarla,

Görəndə bir yerdə məni Sərdarla,

Hər "İP" yetkilisi yaman qudurur.

Sərdar Cəlaloğlu:

Kütlə, "palata"nı sizlər qırdınız,

Əlinin-İsanın saçları pırpız,

Nə vaxt "platforma" yaradırsınız?

Yol ilə gedəndə adamlar sorur.

Etibar Məmmədov:

İndi "platforma" ən iti dişdi,

Siyasi meydana bu bir girişdi,

"Palata" dağa da dönsəydi, işdi,

Bizim "platforma" udardı bu tur.

Sərdar Cəlaloğlu:

"Palata" aparır şumlarda arat,

Bizlər toplayırıq Qərbdən pul, barat,

Cəlb etdikdən sonra çox elektorat,

Etibarla qoşa oxuyarıq "Şur".

Etibar Məmmədov:

İsası xaçlı tuz qazananadək,

Əlisi beş ulduz qazananadək,

"Palata" xoş nüfuz qazananadək,

İsrafil çalardı cəhənnəmdə Sur.

Sərdar Cəlaloğlu:

Əli-İsa itib "patsan" içində,

Özüm Etibarla ad-san içində,

"Palata" batıbdı nöqsan içində,

"Platforma"mızda yoxdu bir qüsur.

Etibar Məmmədov:

Biz zövq almaqdaykən dürdanələrdən,

"Palata" ayrılır divanələrdən,

Xaricdən alınan ianələrdən,

İsa nə yeyibsə, Əliylə qusur.

Sərdar Cəlaloğlu:

"İP"-də tapa bilmir onlar tayını,

Bosslar da göndərmir əsla payını,

Çağırmamaqçün öz qurultayını,

İsa "palata"dan bayırda pusur.

Etibar Məmmədov:

Yox Əli-İsada meydan talantı,

Bunlar axtarmaqda bir süd krantı,

Xaric də göndərmir çoxdan qrantı,

Nüfuzsuz "palata" qalıbdı qısır.

Sərdar Cəlaloğlu:

Bunların önündə açılıb küçə,

İsa ilə Əli yoluq bir cücə,

Faydasız "palata" atılıb küncə,

İndi liderləri yuxu da basır.

Etibar Məmmədov:

Düçar oldu burda hamam iflasa,

Uğrayıb hər iki yam-yam iflasa,

"Palata" uğrayıb tamam iflasa,

Onun liderləri özünü asar.

Sərdar Cəlaloğlu:

Biz elektoratla girdik barışa,

"Palata" bazarı dəyməz quruşa,

İndi "platforma" girir yarışa,

Sərdarla mənimdi bugünkü bazar.

Etibar Məmmədov:

Yeni "platforma" görünməkdə şux,

"Palata" olubdu lüzumsuz güruh,

Bizim birliyimiz saçır yeni ruh,

İsaya, Əliyə kim qulaq asar?

Sərdar Cəlaloğlu:

İşləyə bilərmi "İP" biçarəsiz,

Qərbdi "palata"nı qoyan parəsiz,

Əli bəy "Yurd"unda qalıb çarəsiz,

İsanın qəlbini alıbdı azar.

Etibar Məmmədov:

Kütlə durmur "İP"-in ədası altda,

Gələn yoxdu İsa badəsi altda,

Coşqun "platforma" sədası altda,

"Palata" özünə dar məzar qazar.

Mirzə QƏRƏNFİL