Kristofer Ştrasserin ittihamları ətrafında söhbət

Tahir Kərimli:

Onun ağzındakı tamı əsassız,

Günorta yeməyi, şamı əsassız,

Ştrasserin ittihamı əsassız,

Ştrasserin ittihamı yalandı.

Razi Nurullayev:

Ştrasserpərəstik, özü də qatı,

Qərbə səyirdirik həmişə atı,

Ona "İP" ötürüb təfərrüatı,

Bu, bizim xüsusi, məxfi plandı.

Tahir Kərimli:

Sizi casus kimi gümanlamışdı,

Başınızı xeyli dumanlamışdı,

O, bizi əvvəl də yamanlamışdı,

Sənin Ştrasserin əfi ilandı.

Razi Nurullayev:

Dollar döşənibdi hər bir küçəsi,

Əli də, İsa da onun cücəsi,

Ştrasserdən aslı "İP"in büdcəsi,

O, bizim xeyirxah, əsil klandı.

Tahir Kərimli:

Təkrarlanmaqdadı ötən yolunuz,

Sizi qəbrə gömər gödən yolunuz,

Tupikdi xaricə gedən yolunuz,

Çox möhkəm baryerdi, səddi, dalandı.

Razi Nurullayev:

Özünü ələ al, partlama kindən,

Nə qədər boylanıb baxarıq tindən?

Yararlana billik biz nemətindən,

Ştrasser yek bossdu, cibi kalandı.

Tahir Kərimli:

Qrantı vəd etdi boss qalaq-qalaq,

Liderin gözləri tutulmuş bulaq,

Sizin mindiyiniz at yox, tərs ulaq,

Döyəclədiyiniz adi palandı.

Razi Nurullayev:

Ayaqlara düşdün Vəhdətdə özün,

Bizi pullu gördün, gülmədi üzün,

Bizim yüksəlişi götürmür gözün,

Elə paxıllıqdan könlün bulandı.

Tahir Kərimli:

Liderin xəyali Qərbdə pik tutdu,

Çoxsaylı yetkili dərhal "cik" tutdu,

Liderlər başını "İP"-də dik tutdu,

Dalınca dedilər filan-filandı.

Razi Nurullayev:

Budaq silkələdin pöhrə başında,

Duan çin çıxmadı möhrə başında,

Bossla gördün bizi süfrə başında,

Şirə ifraz etdin, ağzın sulandı.

Tahir Kərimli:

Adına həmişə böhtan deyəcək,

Səni yamanlayıb, səni söyəcək,

Nə alsa, liderlər özü yeyəcək,

Bu yolla, çətin ki, cibin dolandı.

Razi Nurullayev:

Səni bu görkəmdə görən şad deyil,

Yalançı məddahlıq yaxşı ad deyil,

Vəhdətdə gününə düşən yad deyil,

Sənə əziz olan doğma xalandı.

Tahir Kərimli:

20 ildi yuxun çıxmamaqda çin,

Bosslar bir iblisdi, "İP" lideri cin,

İnanmaq, çətin ki, sənin xaricin,

İnsaflı tərəfdi, dərdə qalandı.

Razi Nurullayev:

Kütlə çevrilibdi bizə dalıyla,

Əli aramızda qalıb çuluyla,

İsa da xarici bossun puluyla,

Müs-müftə kəsdirib xəstə qlandı.

Tahir Kərimli:

Ayırar tezliklə sizdən yolları,

Dağıntı gözləyir, verib pulları,

Qərb müftə xərcləmir cüzi dolları,

Onlar verdiyindən artıq alandı.

Razi Nurullayev:

Güzəştə gedərik saqqal darağı,

Mitinq keçirərik, içib arağı,

Təmin ediləcək bossun marağı,

Tale belədisə, demək, olandı.

Tahir Kərimli:

Casusluq yaraşdı bircə "bəli"nə,

Ağıllın olmamış, şükür dəlinə,

Dövlətin sükanı keçcək əlinə,

Ölkənin sərvəti dərhal talandı.

Razi Nurullayev:

Səni bədbəxt etdi İsa yaxtası,

Dolaşdığın məkan sahil buxtası,

İşinə yarayan suvaq taxtası,

Əlində qalan da bircə malandı.

Tahir Kərimli:

İstərsən sandıqdan pambığı tökəm,

Bosslara inanan olar ağlı kəm,

Edib hamınızı Qərb pulu zökəm,

Bossun pul verən yox, şeypur çalandı,

Razi Nurullayev:

Qazancın çox cüzi, qan-tər tökürsən,

Başında gah pambıq, gah yun əkirsən,

Eşitdim Vəhdətdə aclıq çəkirsən,

Yanında ac pişik, bir də tulandı.

Tahir Kərimli:

"İP"-inin əbədi ümidi qırıq,

Hər bir yetkilini basıb hıçqırıq,

Əli mütəmadi salır qışqırıq,

İsa hamınızı dərdə salandı.

Razi Nurullayev:

Sənin göz görəsi baxtındı yatır,

Hələ danışmağa hövsələn çatır,

Nəqliyyat vasitən olubdu qatır,

Bossların töhfəsi sənə qulandı.

Mirzə QƏRƏNFİL