"İP"-də ruh düşkünlüyü artıb

Əhməd Oruc:

"İP" söykənə bilmir heç bir dayağa,

Bələnibdi o, narıncı boyağa,

Çətindi qaldırmaq onu ayağa,

Artıq çoxdan köçüb gedib "palata".

Pənah Hüseynov:

"Palata"nın arxasında xaric fil,

Kim deyir ki, çat başlayıbdı qəfil,

Mən "İP"-dəyəm əlimdə də qərənfil,

Bürünmüşəm həm narıncı xalata.

Əhməd Oruc:

Hər birinə mismar lazım əllilik,

Liderlərə məxsus uzundillilik,

Bunlarda yox nə xəlqilik, millilik,

İsa-Əli bir ləkədir elata.

Pənah Hüseynov:

"Soros" iki badam, bir qoza baxmır,

İsti keçən yay da, bil, yaza baxmır,

Vallah, xaric heç də nüfuza baxmır,

Burda hər şey bağlıdı bir blata.

Əhməd Oruc:

Əlinin qəlinə çökübdü zillət,

Düşüb çorta, hara gedir bu millət?

"Palata"da yoxa çıxıb yağla ət,

İsa tutub qonaqları salata.

Pənah Hüseynov:

Dərd-kədəri Qərbsiz udmaq istəmir,

Bir senti də heç unutmaq istəmir,

Əli-İsa oruc tutmaq istəmir,

Zakuskada dayanıblar salada.

Əhməd Oruc:

Başa düşür hamı bir kəskinliyi,

Qəbul edib "İP" də bu miskinliyi,

"Palata"da artıb ruh düşkünlüyü,

Cadu yazan İsa baxır fala da.

Pənah Hüseynov:

İsa bəydə firiştə yox, tənqid dar,

"Yurd" Əlidə səriştə yox, məntiq dar,

"Palata"da mən olaram xilaskar,

Qəzəblənən İsa gedər dala da.

Əhməd Oruc:

Əli gedər Şərqə-Qərbə, Mərvə yox,

İsa bəyə dram verən kirvə yox,

"Palata"nın qabağında zirvə yox,

Pənah üçün düz sayılar çala da.

Pənah Hüseynov:

"İP" bəyləri sümsünməkdə sümbəkdə,

Xaric onu bəsləyəcək dümbəkdə,

Bir arzu, bir təmanna var bu bəydə,

İstəyir ki, bosslar ayaq yalada.

Əhməd Oruc:

"İP" yaşayır - bu yalan mif dirçəlsin,

Təki İsa, Əli tək tip dirçəlsin,

İstərlər ki, təki bir "İP" dirçəlsin,

Baş əyərlər bosslar verən pula da.

Pənah Hüseynov:

Belə lazım, sizlər həsədlə baxın,

Sıramıza gəlirlər axın-axın,

"Palata"ya qoymarıq səni yaxın,

Partiyanda istər çığır, ula da.

Əhməd Oruc:

Əli-İsa özü xəbis dayılar,

Qərb bossları əsil xəsis dayılar,

"İP"-də gəzir, vallah, pis-pis dayılar,

Yarəb, burda gördüm neçə xala da.

Pənah Hüseynov:

İsa dedi, Əli dedi mən pisəm,

Çoxu deyir adi çürük cevizəm,

Burda bir mən bir az azadnəfisəm,

Qalanının bənzəri var qula da.

Əhməd Oruc:

İnanaram, boss önündə əyilsən,

Qocalsan da, deyirsən ki, ceyilsən,

Sən heç yaxşı siyasətçi deyilsən,

Köks ötürüb lap başını bula da.

Pənah Hüseynov:

Ünvanlayıb bosslar sənə boş qutu,

Əgər qarpız satıramsa, sən lotu,

Biz gizlədə bilmədik bu süqutu,

İy bilməkdə çatmaz sənə tula da.

Əhməd Oruc:

Zil üstündə neçə vokal çəkmişəm,

Sağlığına başa bokal çəkmişəm,

Sağ yumruqla neçə sığal çəkmişəm,

Bundan sonra gəlməlisən yola da.

Pənah Hüseynov:

Əməlsizlər adi əməl qoymadı,

Bu liderlər "İP"-də təməl qoymadı,

İsa, Əli sənə məhəl qoymadı,

Gözləyirsən səni Pənah ulada.

Əhməd Oruc:

Zaman qoymaz "İP"-i qanad açmağa,

Düz olardı sən bürünsən yaşmağa,

Tapmaz idin heç imkan da qaçmağa,

Nə döyərdim səni köhnə talada.

Pənah Hüseynov:

Kədərlin çox, dərdlin artıq, şadın yox,

Həyatında səni sevən qadın yox,

Siyasətdə adım kimi adın yox,

Nə qoyardım səni bağlı qalada.

Əhməd Oruc:

Heç olmasa bilginən bir sərhəd, sədd,

Həmkarların sənə etdi riyazət,

Ağıla gəl, sənlik deyil siyasət,

Qarpızınla get məşğul ol çalada.

Pənah Hüseynov:

Tay-tuşların məndən kənar ötüşdü,

Gedişlərim çoxşaxəli gedişdi,

"Palata"da meydanım çox genişdi,

Siyasətdə bənzərim var polada.

MİRZƏ QƏRƏNFİL