"İP"-in "ACP" problemi

Gülağa Aslanlı:

Rəsul siçan, bizim liderlər dələ,

Sülhəddin bizlərə qurmaqda tələ,

Müzakirə etmək istəmir hələ,

"İP" vahid namizəd məsələsini.

Sülhəddin Əkbər:

"İP"-ə vermək istər öz ruzusundan,

Yapışıb dördəlli puç arzusundan,

Deyin Rəsul kimi əl quzusundan,

"Palata"ya sədr çıxmazmı yəni?

Gülağa Aslanlı:

Aşırın dənizə o saldan onu,

Kənarda saxlayın baş yoldan onu,

Daşındırın o puç xəyaldan onu,

Vurmamış beyninə İsanın kini.

Sülhəddin Əkbər:

Rəsul liderlikdə dərinə enib,

Sanma siyasətə marağı sönüb,

Mahir, Şahbaz, Solmaz yanına dönüb,

"Hərəkat" yaradıb Rəsul bəy yeni.

Gülağa Aslanlı:

Xaricdə "kəsilir" neçənci rübdü,

İndi yumaq kimi o, büzüşübdü,

Xaricdə qocalıb əldən düşübdü,

Azalıb Rəsulun məhsuldar dəni.

Sülhəddin Əkbər:

"İP" başçısı kimi xoş niyyətinə,

Alış deməlisiz qətiyyətinə,

Rəsul bəyin bircə şəxsiyyətinə,

Dəyməzdi Əlinin, İsanın mini.

Gülağa Aslanlı:

Əsas məqsədini qrifləməklə,

Məni başdan edib hərifləməklə,

Rəsulu bu qədər tərifləməklə.

Kövrəltmək istədin yəqin ki, məni.

Sülhəddin Əkbər:

Yazıqsan, qaç "İP"-dən canını qurtar,

Bu quyu səni də mənim tək udar,

Əli də, İsa da tezcə unudar,

Əgər bircə anlıq burulsan tini.

Gülağa Aslanlı:

Bir onamı qalıb məgər qarğalıq?

Nədən etmək istər indi darğalıq?

Rəsul qocalıqda edir yorğalıq,

Köhnə maşın kimi boşalıb şini.

Sülhəddin Əkbər:

Vaşinqton, Avropa qolları kimi,

Şüuru parlaqdı yolları kimi,

Artıb müdrikliyi pulları kimi,

Aşıb-daşmaqdadı liderlik çəni.

Gülağa Aslanlı:

Rəsul boğulmaqda xaricdə kindən,

Narahat oluram kobud səsindən,

Çıxıbdı gövdəsi əndəzəsindən,

Axı heç bilinmir uzunu-eni.

Sülhəddin Əkbər:

Mənim liderim tək şişə bilməzsən,

Təcrübə toplayıb bişə bilməzsən,

Onun kimi başa düşə bilməzsən,

Həyat yollarında darlığı, geni.

Gülağa Aslanlı:

Rəsulda köhnəlib, boşalıb tabaq,

Onun fikri qara, bizimki apağ,

Ayırd da etmişik Rəsuldan qabaq,

Kədərli kəslərlə nikbini, şəni.

Sülhəddin Əkbər:

"Palata" çökübdü, tabı qalmayıb,

Onun tək yorulmuş yabı qalmayıb,

İsanın bir dolu qabı qalmayıb,

Rəsulun əlində doludu sini.

Gülağa Aslanlı:

Bəyanatı belə yatmadı döşə,

Rəsul hazır deyil mitinq-yürüşə,

Əsla mən İsanı qoşmuram işə,

Olmaz "ACP"-də Əlinin təni.

Sülhəddin Əkbər:

Özümə gəlmədim, çox içsəm də həb,

İsanın Əliylə sözü gəlir çəp,

Sizin "palata"da qarışıb məzhəb,

Məlumdu Rəsulun məramı, dini.

Gülağa Aslanlı:

Nədəndi "ACP" "şiri" qayıtmır,

Yəqin çox rahatdı yeri, qayıtmır,

Rəsul çox söz verir, geri qayıtmır,

Dabbaqda gönündən tanıdım səni.

Sülhəddin Əkbər:

"İP"-in uğurları nərd tasındadı,

Gəlişi sizlərin faydasındadı,

Rəsulun sənədi qaydasındadı,

Gedin ələk-vələk eyləyin XİN-i.

Gülağa Asanlı:

Bizi eşitməsin, qoy Rəsul karsa,

Gəlib papağını "İP"-də asarsa,

O, bizim quruma ayaq basarsa,

Xəbərdar edərik təcili DİN-i.

Sülhəddin Əkbər:

Rəsulu pisləsə-pisləməsə də,

Nifrət bəsləsə də, bəsləməsə də,

"İP" onu görməyi istəməsə də,

Rəsul qayıdacaq, açıqdı önü.

Gülağa Aslanlı:

Nyu-York səmasında şimşəklər çaxdı,

Bəlaya tuş etdi həmin "badbaxtı",

Rəsulun o yerdə bitsəydi vaxtı,

Gözaltı edərdi yəqin ki, Çini.

Sülhəddin Əkbər:

Üzü dayanıbdı bəriyə Rəsul,

Gələcək yeriyə-yeriyə Rəsul,

Qayıtmaq istəyir geriyə Rəsul,

Diaqnoz qoşmuşuq: saflaşıb geni.

MİRZƏ QƏRƏNFİL