"16-lar"da parçalanma əlamətləri

Hacıbaba Əzimov:

"16-lar" güclü, özəl qurumdu,

İmkanı genişdi, yüz əl qurumdu,

Məqsəd-məramıyla gözəl qurumdu,

Niyə girirdiniz, niyə çıxdınız?

Taliyət Əliyev:

Köhnə "VAMBP"-də bitini bitdə,

ADP-yə yoldaş oldu "Ümid" də,

Atıb "16-"nı, göstərdik xid tə,

Onun sırasını atdıq da getdik.

Hacıbaba Əzimov:

Başda olanlardan başa çıxdınız,

Bütün ümidləri daşa çaxdınız,

Siz quran deyilsiz, niyə yıxdınız?

Niyə girirdiniz, niyə çıxdınız?

Taliyət Əliyev:

Qurum çamırına batdıq da getdik,

Sizin mövqenizi satdıq da getdik,

Arzuya-niyyətə çadtıq da getdik,

Sizin sıranızı atdıq da getdik.

Hacıbaba Əzimov:

Sizə Qərb olacaq yenə dirəkmi?

Bosslardan alarsız duzmu-çörəkmi?

Bu qəbil dəyişkən olmaq gərəkmi?

Niyə girirdiniz, niyə çıxdınız?

Taliyət Əliyev:

Üzvlər çoxalıb, bir pik düşübdü,

Sizin aranıza cik-bik düşübdü,

Sərdar da, İqbal da incik düşübdü,

Sizin sıranızı atdıq da getdik.

Hacıbaba Əzimov:

Gedib Avropadan quruş gətirmək,

Həmkarlara qarşı vuruş gətirmək,

Çətin olacaqsa duruş gətirmək,

Niyə girirdiniz, niyə çıxdınız?

Taliyət Əliyev:

Biz durub marıqda güddük məqamı,

Sizin süqut üçün qaldırdıq camı,

İstərdik bizim tək davransın hamı,

Sizi təkbaşına atdıq da getdik.

Hacıbaba Əzimov:

Bizim köksümüzə basaraq közü,

Nədən bozartdınız bu qədər üzü?

Hələ də anlaya bilmirəm, düzü,

Niyə girirdiniz, niyə çıxdınız?

Taliyət Əliyev:

Tale də bu yöndə yazıbdı yazı,

Getməmişdən əvvəl biz basdıq qazı,

Cəbhə də sizlərdən deyildi razı,

Odur ki, biz sizi atdıq da getdik.

Hacıbaba Əzimov:

Oyaq qalmaq üçün içdin qəhvə də,

Gözləmə mövqeyi tutdu cəbhə də,

Yol verib çox qaba, kobud səhvə də,

Niyə girirdiniz, niyə çıxdınız?

Taliyət Əliyev:

Rəsulun heç mənim tazım deyildi,

Bu qurum da alın yazım deyildi,

"16"-lar bizə lazım deyildi,

Bu səbəbdən sizi atdıq da getdik.

Hacıbaba Əzimov:

Başa xəzinə tək tökəcəkdi pul,

Gətirər quruma xaricdən məhsul,

Göstərərdi sizə səxavət Rəsul,

Niyə girirdiniz, niyə çıxdınız?

Taliyət Əliyev:

Qurum kürəyinə atıb palanı,

Başına çıxarar Rəsul klanı,

Bizə yaramadı onun planı,

Bununçün sizləri atdıq da getdik.

Hacıbaba Əzimov:

Sizdə vüqar yoxdu, o, vüqarlıdı,

Bəlkə bilmirsiniz Rəsul varlıdı,

Sizin halınızdan etibarlıdı,

Niyə girirdiniz, niyə çıxdınız?

Taliyət Əliyev:

Kəsif qoxu verdi duxi ətriniz,

Qərbdə bilinmədi sizin qədriniz,

Bizə lazım deyil avam sədriniz,

Odur ki, sizləri atdıq da getdik.

Hacıbaba Əzimov:

Əvvəl bu qurumu saydınız əntiq,

Hətta önünüzdə yoxdu yoxuş, dik,

Biz baş açmadıq ki, nə idi məntiq,

Niyə girirdiniz, niyə çıxdınız?

Taliyət Əliyev:

O, bizə maraqlı deyil, əvvəla,

Açar başınıza qurum çox bəla,

Biz onu pis saydıq, saymadıq əla,

Sizin sıranızı atdıq da getdik.

Hıcıbaba Əzimov:

Qol deyib yeritdik iti biz sizə,

Əvvəlcə göstərdik geniş iz sizə,

Sonra edəcəkdik kömək biz sizə,

Niyə girirdiniz, niyə çıxdınız?

Taliyət Əliyev:

Biz əvvəl sizlərə Rəsulu verdik,

Sonra vəd etdiyi məhsulu verdik,

Könüllü olaraq şax pulu verdik,

Həm də sıranızı atdıq da getdik.

Hacıbaba Əzimov:

Bu qədər layihə eylədik tərtib,

Qaçdınız, yolüstü onları çərtib,

Rəsul gözünümü sizə bərəldib?

Niyə girirdiniz, niyə çıxdınız?

Taliyət Əliyev:

Yüksək ad, şərəf-şan, soy sizə qalsın,

Biz yasa gedənik, toy sizə qalsın,

Rəsul da, pulu da qoy sizə qalsın,

Bizsə sıranızı atdıq da getdik.

MİRZƏ QƏRƏNFİL