Hər ikisi də belə deyir: "Özüm olmalıyam vahid namizəd"

İsa Qəmbərov:

"Palata"da dəstək o Pənah mənə,

Bu titulu verib bir Allah mənə,

Gözlərini geniş açıb bax mənə,

Sənin kimilərə eyləyirəm vəd,

Özüm olmalıyam vahid namizəd.

Əli Kərimov:

Dostlarım müdriklər, həm Lot olubdu,

Liderlik sənəmi bir mod olubdu?

Nəsibin həmişə tut, ot olubdu,

Qoyaydın bu axmaq sözünə sən sədd,

Özüm olmalıyam vahid namizəd.

İsa Qəmbərov:

Çox qrant gətirtdim, sən isə uddun,

Sənə kürsü verdim, tez də unutdun,

Həmişə Etibar yolunu tutdun,

Adam ol, başa düş bir baryer, sərhəd,

Özüm olmalıyam vahid namizəd.

Əli Kərimov:

Məndə bosslar savad bəlkəm də görüb,

Bütün xaric məni ölkəmdə görüb,

Məni zəif, xəstə görkəmdə görüb,

İflic etməyimi eyləmisən qət?

Özüm olmalıyam vahid namizəd.

İsa Qəmbərov:

Qərb də təsdiq edib sırtığam səndən,

Həm də xeyli ağzı yırtığam səndən,

Yaxşı bilirsən ki, artığam səndən,

Elə bu dəfə də edirsən qələt,

Özüm olmalıyam vahid namizəd.

Əli Kərimov:

Əriştə kəsmədin, bol umac qoydun,

Spiker olanda başa tac qoydun,

İqtidarda oldun, xalqı ac qoydun,

Özünsə evində yedin yağ, bal, ət,

Özüm olmalıyam vahid namizəd.

İsa Qəmbərov:

Mən səni görmüşəm tindən qabaqda,

İstərsən olasan kindən, qabaqda,

Həmişə olmuşam səndən qabaqda,

Sübut eylədin ki, bədxahsan, həm bəd,

Özüm olmalıyam vahid namizəd.

Əli Kərimov:

Müsavatdan öndə quruldu bəndim,

Xaricdə də nüfuz qazandı "kəndi"m,

Uğuruma çıxdın, daşa dirəndim,

Adınla bağlıdı neçə cinayət,

Özüm olmalıyam vahid namizəd.

İsa Qəmbərov:

Bollu arağımı içməyin aydın,

Məni alaq kimi biçməyin aydın,

Sonra ayaqlayıb keçməyin aydın,

Sən öz liderinə etdin xəyanət,

Özüm olmalıyam vahid namizəd.

Əli Kərimov:

A yazıq, halına yanan qalmayıb,

Məni qurumumda danan qalmayıb,

Səni partiyanda anan qalmayıb,

Səninkindən çoxdu məndə dəyanət,

Özüm olmalıyam vahid namizəd.

İsa Qəmbərov:

Adın da dalana, tinə yaraşar,

Sənin kimisinə tənə yaraşar,

Namizədlik adı mənə yaraşar,

Yaraşmır adına, əsla, bu sənət,

Özüm olmalıyam vahid namizəd.

Əli Kərimov:

Lap batmaq üzrədi Müsavat gəmi,

Götür üzərinə daimi qəmi,

Tanıyıb adını pis adam kimi,

Kütlələr adına oxuyur lənət,

Özüm olmalıyam vahid namizəd.

İsa Qəmbərov:

Nitqdə mən bülbüləm, sən adi qarğa,

Sən ola bilməzsən başımda darğa,

İstəsən verərəm bilərzik, sırğa,

Üstündə də xeyli qır-qızıl, zinət,

Özüm olmalıyam vahid namizəd.

Əli Kərimov:

Hamı yaxşı bilir şir kimi mənəm,

Deyirsən ki, guya çirkini mənəm,

Müxalif durumun ilkini mənə,

Həmişə nəsibin olubdu töhmət,

Özüm olmalıyam vahid namizəd.

İsa Qəmbərov:

Sən məni görürdün dolu cib kimi,

Mən səni görmüşəm bir talib kimi,

Özümü hiss etdim bir qalib kimi,

Müxalif duruma vermisən möhnət,

Özüm olmalıyam vahid namizəd.

Əli Kərimov:

Mənən qocalıbsan, azalıb şirən,

Düşüb yetkililər yanından pərən,

Niyyətin absurddu, fikirlər çərən,

Sənə həmkarların göstərmir hörmət,

Özüm olmalıyam vahid namizəd.

İsa Qəmbərov:

Yaxşılıq etmədin bircə nəfərə,

Önündə açılıb uçurum dərə,

Heç çıxa bilmirsən Qərbə səfərə,

A yazıq, saysan da xarici cənnət,

Özüm olmalıyam vahid namizəd.

Əli Kərimov:

Buradan bosslar da duyur ətrimi,

Başının üstündən atdın çətrimi,

Heç zaman bilmədin mənim qədrimi,

İndi üzərimə qoyursan minnət,

Özüm olmalıyam vahid namizəd.

İsa Qəmbərov:

Bala, çayını iç, hələ cemin var,

Sənin nə İvanın, nə də Semin var,

İndi eşitmişəm problemin var,

Düz olar özünə eyləsən sünnət,

Özüm olmalıyam vahid namizəd.

Əli Kərimov:

Etimadsızlıqdan ürək yuxalıb,

Sənə cəmiyyətdə maraq yoxalıb,

İndi Müsavatdan axın çoxalıb,

Qalxıb əleyhinə Qobustan, Ələt,

Özüm olmalıyam vahid namizəd.

Mirzə QƏRƏNFİL