Siyasi və iqtisadi əlaqələrdə yeni təşəbbüslər - ŞƏRH

Azərbaycan və Almaniya arasında əlaqələrin müsbət inkişafı mühüm irəliləyişlərə səbəb olmuşdur. Hər iki ölkə arasında qarşılıqlı maraqların güclənməsi, siyasi, iqtisadi və mədəni sahələrdə əməkdaşlığın genişlənməsi Azərbaycan-Almaniya münasibətlərinin müsbət inkişafına təkan vermişdir. Azərbaycan və Almaniya arasında əlaqələrin inkişafında ulu öndər Heydər Əliyev və Prezident İlham Əliyevin rolu əvəzsizdir. Ümummilli lider Heydər Əliyev xalqın təkidli tələbi ilə yenidən hakimiyyətə gəlməsindən sonra Almaniya ilə əlaqələrin möhkəmlənməsinə xüsusi diqqət yetirmiş, iqtisadi və siyasi sahələrdə əməkdaşlığın əsasını qoymuşdur. Prezident İlham Əliyev isə bu əməkdaşlığı inkişaf etdirmişdir. Prezident İlham Əliyevin təşəbbüsü ilə iki ölkə arasında strateji tərəfdaşlıq qurulmuş və regional təhlükəsizlik, enerji təhlükəsizliyi kimi mühüm məsələlərdə sıx əməkdaşlıq həyata keçirilmişdir. Qeyd edək ki, əlaqələrin inkişafında rəsmi səfərlərin rolu çox əhəmiyyətlidir.

2025-ci il aprelin 2-də Almaniya Federativ Respublikasının Prezidenti Frank-Valter Ştaynmayerin Azərbaycana rəsmi səfəri ikitərəfli münasibətlərin inkişafında mühüm mərhələ olmuşdur. Bu səfər çərçivəsində Prezident İlham Əliyev və Prezident Ştaynmayer arasında keçirilən görüşlərdə siyasi, iqtisadi və mədəni sahələrdə əməkdaşlığın genişləndirilməsi məsələləri müzakirə edilmişdir. Prezident İlham Əliyevin mətbuata verdiyi bəyanatda vurğuladığı kimi, bu səfər Azərbaycan-Almaniya əlaqələrinə yeni müsbət təkan verəcəkdir.

Ştaynmayerin Bakıya səfəri Almaniyanın Azərbaycanla əlaqələrə strateji yanaşmasının göstəricisi olmaqla yanaşı, ikitərəfli əməkdaşlığın yeni mərhələyə qədəm qoymasına şərait yaradır. Prezident İlham Əliyevlə görüş zamanı iki ölkə arasında siyasi dialoqun intensivləşdirilməsi və qarşılıqlı maraq doğuran məsələlərdə əməkdaşlığın dərinləşdirilməsi müzakirə olunmuşdur.

Səfər zamanı əsas diqqət Cənubi Qafqazda təhlükəsizliyin təmin olunmasına yönəlmişdir. Prezident Ştaynmayer Azərbaycan və Ermənistan arasında sülh prosesinin sürətləndirilməsinin vacibliyini qeyd edərək, Almaniyanın bu prosesdə vasitəçilik və dəstək göstərməyə hazır olduğunu bildirib. Almaniya, Avropa İttifaqının aparıcı dövləti olaraq, regionda dayanıqlı sülhün təmin olunmasında mühüm rol oynaya bilər.

Almaniya Azərbaycanı etibarlı enerji tərəfdaşı kimi qəbul edir və Avropanın enerji təhlükəsizliyinin təmin edilməsində Azərbaycanın rolunu yüksək qiymətləndirir. Görüşlər zamanı yaşıl enerji sahəsində əməkdaşlıq imkanları geniş müzakirə olunmuşdur. Azərbaycan 2030-cu ilə qədər bərpa olunan enerji istehsalını 6 giqavata çatdırmaq niyyətindədir və bu prosesdə Almaniya şirkətlərinin iştirakı strateji əhəmiyyət daşıyır. Xüsusilə, Xəzər dənizində külək enerjisi layihələrinin həyata keçirilməsi və yaşıl enerjinin Avropaya nəqli məsələləri diqqət mərkəzində olmuşdur.

Prezident Ştaynmayer Azərbaycanın mühüm nəqliyyat qovşağı olduğunu və Orta Dəhlizin Almaniya üçün yeni iqtisadi imkanlar yaratdığını vurğulayıb. Almaniya Azərbaycan vasitəsilə Asiya və Avropa arasında ticarət əlaqələrinin genişləndirilməsində maraqlıdır. Orta Dəhlizin imkanları Almaniya üçün yeni ticarət marşrutlarının formalaşmasına töhfə verə bilər.

Prezident İlham Əliyev mətbuata bəyanatında qeyd etmişdir ki, Prezident Ştaynmayerin səfəri Azərbaycan-Almaniya münasibətlərinin inkişafına mühüm töhfə verəcəkdir. Görüşlər zamanı tərəflər enerji, ticarət, nəqliyyat və mədəniyyət sahələrində əməkdaşlığın genişləndirilməsi perspektivlərini müzakirə etmişlər. Xüsusilə, enerji sektorunda əməkdaşlıq məsələləri diqqət mərkəzində olmuşdur, çünki Azərbaycan Avropanın enerji təhlükəsizliyində mühüm rol oynayır.

Mətbuata bəyənatda Azərbaycanın ev sahibliyi etdiyi COP29 beynəlxalq iqlim konfransı qlobal iqlim dəyişikliyi ilə mübarizədə ölkəmizin əhəmiyyətli nəticələr əldə edilməsindən bəhs olunub. Qey edək ki, konfransda inkişaf etməkdə olan ölkələrə iqlim dəyişikliyinə uyğunlaşma və azaldılması tədbirləri üçün maliyyə dəstəyinin artırılması qərara alınmışdır. Bu çərçivədə, inkişaf etmiş ölkələr tərəfindən 2035-ci ilə qədər hər il ən azı 300 milyard ABŞ dolları məbləğində maliyyə vəsaitinin ayrılması razılaşdırılmışdır. Azərbaycan, öz növbəsində, 2030-cu ilə qədər bərpa olunan enerji mənbələrinin payını 30%-ə çatdırmağı hədəfləyir və bu istiqamətdə ciddi addımlar atır.

Bundan əlavə Prezident İlham Əliyev mətbuata verdiyi bəyanatda Azərbaycanın 30 il ərzində işğaldan əziyyət çəkməsi haqqında da bəhs edib. Qeyd olunub ki, ölkəmiz Ermənistanın işğalı altında olan ərazilərinin azad edilməsi üçün mübarizə aparmışdır. Əldə olunan tarixi Zəfərlər nəticəsində Azərbaycan öz ərazi bütövlüyünü bərpa etmişdir. Bu müddət ərzində işğal olunmuş ərazilərdə infrastruktur dağıdılmış, mədəni irsə ciddi ziyan vurulmuşdur. Hazırda Azərbaycan hökuməti həmin ərazilərin bərpası və məcburi köçkünlərin geri qayıtması üçün genişmiqyaslı layihələr həyata keçirir.

Prezident Frank-Valter Ştaynmayerin Azərbaycana səfəri və Prezident İlham Əliyevin mətbuata verdiyi bəyanat Azərbaycan-Almaniya münasibətlərinin inkişafında yeni səhifə açmışdır. Bu səfər, eyni zamanda, regional sabitlik və inkişaf üçün mühüm əhəmiyyət kəsb edir. Bundan əlavə, səfər çərçivəsində aparılan müzakirələr və əldə edilən razılaşmalar, Azərbaycan və Almaniya arasında həm siyasi, həm də iqtisadi sahələrdə əməkdaşlığın daha da dərinləşməsinə imkan yaratmışdır. Bu təşəbbüslər, xüsusilə enerji, nəqliyyat və regional təhlükəsizlik sahələrində uzunmüddətli tərəfdaşlığın əsasını qoyur. Azərbaycan-Almaniya əlaqələrinin daha da möhkəmlənməsi və yeni təşəbbüslərin həyata keçirilməsi üçün bu səfər mühüm platforma rolunu oynayır.

Bəxtiyar Nəbiyev

YAP Yasamal rayon təşkilatının sədri