Azərbaycanda aqrar sektorun inkişafı və strateji hədəflər

Mayın 25-də Prezident İlham Əliyevin rəhbərliyi ilə keçirilən kənd təsərrüfatı müşavirəsi ölkənin aqrar gələcəyini formalaşdıran mühüm addım oldu. Dövlət başçısı tərəfindən irəli sürülən prioritetlər yaxın illərdə məhsuldarlığın artırılması, dövlət dəstəyinin (subsidiyaların) effektiv idarə edilməsi və xarici bazarlara çıxış imkanlarının genişləndirilməsi üçün dəqiq yol xəritəsi rolunu oynayır.

Müşavirədə toxunulan ən strateji məsələ, heç şübhəsiz, daxili bazarda özünü təminetmə səviyyəsinin yüksəldilməsi və milli ərzaq təhlükəsizliyinin qorunması oldu. Hazırda dünyada hökm sürən geosiyasi gərginliklər, qlobal münaqişələr və logistik zəncirlərin qırılması fonunda kənd təsərrüfatı xammalının bahalaşması müşahidə olunur. Eyni zamanda qlobal iqlim dəyişikliyinin yaratdığı fəsadlar aqrar sektora ciddi təzyiqlər edir. Belə bir mürəkkəb beynəlxalq şəraitdə daxili istehsalın gücləndirilməsi hər bir dövlət üçün həyati əhəmiyyət daşıyır.
Bu çağırışları nəzərə alan Azərbaycan öz kənd təsərrüfatı potensialını maksimum dərəcədə aktivləşdirməyi hədəfləyir. Ötən illər ərzində qazanılmış uğurlar və istehsal həcmindəki artım bu sahədə möhkəm zəmin yaradıb. 2030-cu ilə qədər olan dövrü əhatə edən Milli Prioritetlər Proqramına əsasən, ölkəmiz strateji məhsullar, xüsusilə də buğda ilə daxili tələbatı 100 faiz yerli istehsal hesabına ödəməyi qarşıya məqsəd qoyub. Digər məhsullar üzrə isə ixrac həcminin daha da böyüdülməsi nəzərdə tutulur. Bu iddialı hədəfə çatmaq üçün həm dövlət büdcəsindən kapital qoyuluşları, həm də özəl sektorun investisiyaları sinerji şəklində birləşdiriləcək.
Proqramın uğurla icrası həm də yerli fermerlərin və mülkiyyətçilərin stimullaşdırılmasından asılıdır. Bu məqsədlə güzəştli kreditləşmə proqramları genişləndiriləcək və subsidiya mexanizmləri daha şəffaf, effektiv formaya salınacaq. İslahatların digər mühüm istiqaməti isə xarici ticarətin coğrafiyasını şaxələndirməkdir. Azərbaycan ənənəvi bazarlardan asılılığı azaltmaq üçün yeni regional və qlobal bazarlara çıxış əldə etməyi, ixrac etdiyi məhsulların çeşidini zənginləşdirməyi və bununla da beynəlxalq arenada öz iqtisadi mövqeyini daha da möhkəmləndirməyi planlaşdırır.

Cəlal Əliyev
YAP Masallı rayon təşkilatının əməkdaşı