Zəfərə aparan yolun qəhrəmanlıq salnaməsi - ŞƏRH

27 Sentyabr Azərbaycan xalqının yaddaşında Vətən müharibəsinin başladığı, xalqımızın öz tarixi torpaqlarının azadlığı uğrunda mübarizəyə qalxdığı gün kimi xüsusi yer tutur. Bu tarix həm də Azərbaycanın ərazi bütövlüyü və suverenliyi uğrunda canından keçən şəhidlərimizin əziz xatirəsinə ehtiramın ifadəsidir. Azərbaycan Respublikasının Prezidentinin 2 dekabr 2020-ci il tarixli Sərəncamı ilə hər il sentyabrın 27-si ölkəmizdə Anım Günü kimi qeyd edilir.
2020-ci il sentyabrın 27-də Ermənistan silahlı qüvvələrinin Azərbaycanın yaşayış məntəqələrini və hərbi mövqelərini atəşə tutması nəticəsində növbəti hərbi təcavüzə cavab olaraq Azərbaycan Ordusu əks-hücum əməliyyatına başladı. Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə başlayan Vətən müharibəsi 44 gün davam etdi. Müharibənin ilk günlərindən etibarən Azərbaycan xalqı və ordusu vahid məqsəd ətrafında səfərbər oldu. Minlərlə Azərbaycan gənci könüllü olaraq cəbhəyə yollandı, arxa cəbhədə isə xalqımız ordumuza hərtərəfli dəstək göstərdi.
44 gün ərzində Azərbaycan Ordusu mürəkkəb relyefə və uzun illər ərzində qurulmuş müdafiə istehkamlarına malik mövqeləri yararaq irəlilədi. Cəbrayıl, Füzuli, Zəngilan, Qubadlı, Şuşa və digər ərazilərin azad olunması Vətən müharibəsinin gedişində mühüm mərhələlər təşkil etdi. 2020-ci il noyabrın 10-da imzalanmış üçtərəfli bəyanatla hərbi əməliyyatlar dayandırıldı və Azərbaycanın bir sıra rayonlarının döyüşsüz şəkildə qaytarılması təmin edildi.
Vətən müharibəsi Azərbaycanın müasir tarixində mühüm dönüş nöqtəsi oldu. Döyüş meydanında göstərilən qəhrəmanlıq, hərbi qulluqçuların fədakarlığı və xalqın həmrəyliyi nəticəsində ölkəmizin ərazi bütövlüyünün bərpası istiqamətində mühüm nəticə əldə edildi. Azərbaycan Ordusunun hərbi əməliyyatları həm də ordunun döyüş qabiliyyətinin, peşəkarlığının və müasir hərbi texnologiyalardan istifadə imkanlarının nümayişi kimi qiymətləndirildi.
Vətən müharibəsindən sonra qarşıda yeni bir mərhələ yarandı. İşğaldan azad edilmiş ərazilərdə genişmiqyaslı bərpa və quruculuq işlərinə başlanıldı, şəhər və kəndlərin yenidən qurulması, nəqliyyat və enerji infrastrukturunun yaradılması, əhalinin doğma yurdlarına qayıdışının təmin edilməsi istiqamətində layihələr həyata keçirildi. Beləliklə, hərbi Zəfərin ardınca quruculuq və Böyük Qayıdış mərhələsi başladı.
2023-cü ilin sentyabrında baş verən hadisələr Azərbaycanın dövlətçilik tarixində daha bir mühüm mərhələ yaratdı. Sentyabrın 19-da başlanan və 23 saat davam edən lokal xarakterli antiterror tədbirlərindən sonra Azərbaycan Respublikasının bütün ərazisində dövlət suverenliyinin bərpası təmin edildi. Azərbaycan Prezidentinin 19 sentyabr 2024-cü il tarixli Sərəncamı ilə sentyabrın 20-si Dövlət Suverenliyi Günü elan edildi. Bununla da 2020-ci ildə ərazi bütövlüyünün bərpası istiqamətində əldə edilmiş Zəfər 2023-cü ildə Azərbaycanın bütün ərazisində dövlət suverenliyinin təmin olunması ilə tamamlandı.
27 Sentyabr – Anım Günü məhz bu tarixi yolun başlanğıcını və Vətən müharibəsində canından keçən şəhidlərimizin əziz xatirəsini ehtiramla yad etmək baxımından xüsusi əhəmiyyət daşıyır. Bu gün yalnız müharibənin başlanmasının ildönümü deyil, həm də şəhidlərin qarşısında mənəvi borcun ifadəsidir.
Azərbaycan xalqı şəhidlərin ailələrinə, qazilərə və müharibə iştirakçılarına göstərilən diqqət və qayğını dövlət siyasətinin mühüm istiqamətlərindən biri kimi qiymətləndirir. Şəhid ailələrinin və qazilərin sosial müdafiəsinin gücləndirilməsi, onların mənzil və digər sosial təminatlarla əhatə olunması istiqamətində müxtəlif proqramlar həyata keçirilir. Bu tədbirlər Vətən müharibəsinin iştirakçılarına və şəhid ailələrinə göstərilən dövlət qayğısının davamlı xarakter daşıdığını göstərir.
2020-ci il dekabrın 10-da Bakının Azadlıq meydanında Vətən müharibəsində Qələbəyə həsr olunmuş Zəfər paradının keçirilməsi isə Azərbaycan tarixinin yaddaqalan hadisələrindən biri oldu. Parad Azərbaycan Ordusunun əldə etdiyi hərbi nəticələrin nümayişi olmaqla yanaşı, Vətən müharibəsinin iştirakçılarına və şəhidlərin xatirəsinə ehtiramın ifadəsi kimi yadda qaldı.
Bu gün Azərbaycan xalqı 27 Sentyabrı böyük ehtiram və hüzn hissi ilə qeyd edir. Şəhidlərimizin xatirəsi dövlət və cəmiyyət tərəfindən daim uca tutulur, onların ailələrinə göstərilən diqqət davam etdirilir. Anım Günü gənc nəslə Vətən, dövlətçilik, milli həmrəylik və tarixi yaddaş kimi dəyərlərin aşılanması baxımından da mühüm əhəmiyyət daşıyır.
Azərbaycan xalqı Vətən müharibəsində canından keçən bütün şəhidlərin əziz xatirəsini daim yaşadacaqdır. Onların göstərdiyi qəhrəmanlıq ölkəmizin müasir tarixinin ən mühüm səhifələrindən biri kimi yaddaşlarda qalacaq.
Allah bütün şəhidlərimizə rəhmət eləsin! Onların əziz xatirəsi daim uca tutulacaqdır.

Fidan Hüseynova
YAP Quba rayon təşkilatının sədri