Sabitlik dövlətin gücünün və xalqın rifahının əsasını təşkil edir - ŞƏRH

Bugünkü dünyada ən önəmli amillərdən biri siyasi və iqtisadi sabitlikdir. Çünki hər bir dövlətin gücü yalnız onun hərbi qüdrəti, ərazisi və təbii sərvətləri ilə deyil, həm də ölkədə hökm sürən sabitlik, xalqın dövlətə olan inamı və insanların gələcəyə ümidlə baxması ilə ölçülür.

Tarix göstərir ki, siyasi sabitliyin olmadığı yerdə iqtisadi inkişafdan, iqtisadi inkişafın olmadığı yerdə isə insanların rifahından danışmaq çətindir. Müharibələr, daxili qarşıdurmalar, iqtisadi böhranlar və beynəlxalq münasibətlərdə yaranan gərginliklər ilk növbədə sadə insanların həyatına təsir göstərir. Bu baxımdan, sabitliyin qorunması təkcə dövlətin deyil, bütövlükdə cəmiyyətin qarşısında duran mühüm vəzifələrdən biridir.

Mənim fikrimcə, güclü dövlət yalnız öz sərhədlərini qoruyan deyil, eyni zamanda vətəndaşının sosial vəziyyətini düşünən, onun gələcəyinə təminat yaradan, gənclərinə inkişaf imkanları açan və insanların əməyini qiymətləndirən dövlətdir. Çünki dövlətin əsas dayağı onun xalqıdır. Xalqın rifahı, təhlükəsizliyi və dövlətə inamı nə qədər güclü olarsa, dövlətin gələcəyi də bir o qədər möhkəm olar.

İqtisadi sabitlik dedikdə yalnız rəqəmlərin artmasını, yeni müəssisələrin açılmasını və investisiyaların cəlb olunmasını nəzərdə tutmamalıyıq. İqtisadi inkişafın nəticələri insanların gündəlik həyatında hiss edilməli, ailələrin sosial vəziyyətinə müsbət təsir göstərməli, zəhmətkeş insanların əməyinin qarşılığı verilməli və hər bir vətəndaş öz gələcəyini qurmaq üçün real imkanlara malik olmalıdır.

Siyasi sabitlik isə qarşılıqlı etimad, qanunun aliliyi, ədalət prinsipləri və cəmiyyətin maraqlarının qorunması ilə daha da möhkəmlənir. İnsanlar dövlətin qərarlarına inanmalı, öz hüquqlarının qorunduğunu görməli və ölkənin inkişafında iştirak etdiklərini hiss etməlidirlər.

Bu gün dünyada baş verən hadisələr bir daha sübut edir ki, sabitliyin qiyməti heç də hər zaman onun mövcud olduğu dövrdə tam dərk edilmir. Bəzən insanlar sülhün, təhlükəsizliyin və iqtisadi imkanların əsl dəyərini yalnız bunların itirildiyi ölkələrin vəziyyətini gördükdə anlayırlar. Müharibənin dağıtdığı şəhərləri, doğma yurdlarından didərgin düşən insanları və iqtisadi böhranların məngənəsində sıxılan ailələri müşahidə etdikdə sabitliyin nə qədər böyük nemət olduğunu daha aydın başa düşürük.

Azərbaycan xalqı da tarix boyu müxtəlif çətinliklərlə üzləşib. Müharibənin ağrı-acısını yaşamış, şəhidlər vermiş, torpaq itkisi və məcburi köçkünlük kimi ağır sınaqlardan keçmiş bir xalq olaraq sülhün, təhlükəsizliyin və dövlət müstəqilliyinin əhəmiyyətini yaxşı anlayırıq. Bu gün əsas məqsədlərdən biri əldə olunan nailiyyətləri qorumaq, iqtisadi inkişafı davam etdirmək, sosial rifahı yüksəltmək və gələcək nəsillərə daha güclü dövlət miras qoymaqdır.

Unutmamalıyıq ki, dövlətin inkişafı yalnız bu gün əldə olunan nəticələrlə ölçülmür. Əsl inkişaf gələcək üçün yaradılan imkanlarla, gənclərin perspektivləri ilə, ailələrin sosial təminatı ilə və cəmiyyətin sabaha olan inamı ilə müəyyən edilir.

Siyasi sabitlik dövlətin dayağı, iqtisadi sabitlik xalqın rifahı, ədalət və qarşılıqlı etimad isə bu iki amili birləşdirən əsas qüvvədir. Bu prinsiplər qorunduğu müddətdə dövlət daha möhkəm, cəmiyyət daha güclü, gələcək isə daha etibarlı olar.

Mən hesab edirəm ki, hər birimizin əsas məqsədi sabitliyin qorunmasına, iqtisadi inkişafın dəstəklənməsinə, milli birliyin möhkəmləndirilməsinə və insanların rifahının yüksəldilməsinə töhfə vermək olmalıdır. Çünki güclü dövlət yalnız bugünkü uğurları ilə deyil, xalqına bəxş etdiyi əmin-amanlıq, inam və gələcəyə açdığı yollarla tanınır.

Əli Əlisoy

YAP Şərur rayon təşkilatının fəal üzvü