Yeni Azərbaycan Partiyasının yeni mərhələyə baxışı: milli həmrəylik və davamlı inkişafın siyasi strategiyası

Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin Yeni Azərbaycan Partiyasının VIII Qurultayında çıxışı ölkəmizin ictimai-siyasi həyatında mühüm əhəmiyyət daşıyan proqram xarakterli nitq kimi diqqəti cəlb edir. Dövlət başçısının çıxışında Azərbaycanın son illərdə əldə etdiyi tarixi nailiyyətlərə nəzər salınmaqla yanaşı, qarşıdakı dövr üçün ölkənin inkişaf prioritetləri, siyasi sabitliyin qorunması, milli həmrəyliyin daha da möhkəmləndirilməsi və dövlətçilik ənənələrinin davamlı şəkildə inkişaf etdirilməsi ilə bağlı mühüm mesajlar ifadə olunub.

Yeni Azərbaycan Partiyasının VIII Qurultayı partiyanın çoxillik siyasi fəaliyyətinin mühüm mərhələlərindən biri olmaqla, ölkənin gələcək inkişaf istiqamətlərinin müəyyənləşdirilməsi baxımından da xüsusi əhəmiyyət daşıyır. Azərbaycan Prezidenti və YAP Sədri İlham Əliyevin çıxışında vurğulandığı kimi, Yeni Azərbaycan Partiyası yarandığı gündən etibarən Azərbaycanın ictimai-siyasi həyatında mühüm rol oynayıb, milli maraqların müdafiəsini, dövlətçilik prinsiplərinin möhkəmləndirilməsini və ölkənin hərtərəfli inkişafını fəaliyyətinin əsas istiqamətləri kimi müəyyənləşdirib.
1992-ci ildə Ümummilli Lider Heydər Əliyevin rəhbərliyi ilə yaradılan Yeni Azərbaycan Partiyası ötən dövr ərzində böyük siyasi yol keçib. Partiyanın fəaliyyəti Azərbaycanın müstəqilliyinin möhkəmləndirilməsi, siyasi sabitliyin təmin olunması və sosial-iqtisadi inkişafın sürətləndirilməsi ilə sıx bağlı olub. Bu siyasi kurs Prezident İlham Əliyevin rəhbərliyi ilə yeni çağırışlara uyğun şəkildə davam etdirilib və müasir Azərbaycanın əldə etdiyi mühüm uğurların siyasi dayaqlarından birinə çevrilib.
Prezident İlham Əliyevin çıxışında Azərbaycanın tarixi Zəfərinin xüsusi yeri olması təsadüfi deyil. 44 günlük Vətən müharibəsində qazanılmış Qələbə və ərazi bütövlüyümüzün bərpa olunması Azərbaycan dövlətçiliyinin tarixində yeni mərhələnin başlanğıcını qoyub. Bu Qələbə yalnız hərbi-siyasi nəticə deyil, eyni zamanda xalqımızın milli iradəsinin, dövlətimizin gücünün və milli həmrəyliyimizin təntənəsi kimi tarixə düşüb.
Bu gün işğaldan azad edilmiş ərazilərdə genişmiqyaslı bərpa və quruculuq işlərinin aparılması Azərbaycanın qarşısında duran yeni strateji vəzifələrin miqyasını nümayiş etdirir. Qarabağın və Şərqi Zəngəzurun yenidən qurulması, keçmiş məcburi köçkünlərin doğma yurdlarına qayıdışının təmin edilməsi, həmin ərazilərin ölkənin iqtisadi və sosial həyatına inteqrasiyası dövlət siyasətinin mühüm istiqamətlərindəndir.
Dövlət başçısının çıxışında Azərbaycanın beynəlxalq mövqelərinin möhkəmlənməsinə də xüsusi diqqət yetirilməsi ölkəmizin xarici siyasətinin ardıcıl və milli maraqlara əsaslanan xarakterini bir daha göstərir. Azərbaycanın regionda və beynəlxalq münasibətlər sistemində artan nüfuzu, müstəqil xarici siyasət yürütməsi və mühüm beynəlxalq təşəbbüslərlə çıxış etməsi ölkəmizin siyasi çəkisinin daha da yüksəlməsinə imkan yaradıb.
İlham Əliyevin çıxışında mühüm məqamlardan biri də Yeni Azərbaycan Partiyasının qarşısında dayanan vəzifələrin yeni dövrün tələblərinə uyğun müəyyənləşdirilməsidir. Müasir dövrdə siyasi partiyanın gücü yalnız onun təşkilati imkanları ilə deyil, cəmiyyətin inkişaf proseslərinə təsir göstərmək, milli maraqları düzgün ifadə etmək və gələcəyə hesablanmış siyasi baxış formalaşdırmaq qabiliyyəti ilə ölçülür. Bu baxımdan YAP-ın qarşısında duran əsas vəzifələr sırasında gənclərlə işin gücləndirilməsi, ictimai-siyasi fəallığın artırılması, yeni çağırışlara uyğun siyasi fəaliyyətin qurulması xüsusi əhəmiyyət kəsb edir.
Yeni Azərbaycan Partiyasının VIII Qurultayı həm də siyasi varislik və yeni nəsillərin proseslərə fəal cəlb olunması baxımından mühüm mərhələdir. Azərbaycanın gələcək inkişafında gənclərin rolu böyükdür. Dövlət idarəçiliyində, ictimai-siyasi və sosial proseslərdə fəal iştirak edən gənc nəslin formalaşması ölkənin davamlı inkişafının əsas şərtlərindən biridir.
Prezident İlham Əliyevin qurultaydakı çıxışında səsləndirdiyi fikirlər Yeni Azərbaycan Partiyasının qarşıdakı fəaliyyətinin əsas istiqamətlərinə işıq salmaqla yanaşı, Azərbaycanın yeni tarixi mərhələdə qarşıya qoyduğu məqsədləri də aydın şəkildə ortaya qoyur. Bu məqsədlər sırasında güclü dövlətçilik, davamlı iqtisadi inkişaf, sosial rifahın yüksəldilməsi, milli həmrəyliyin qorunması, ərazi bütövlüyü və suverenliyin möhkəmləndirilməsi, Azərbaycanın beynəlxalq nüfuzunun daha da artırılması xüsusi yer tutur.
Bu gün Yeni Azərbaycan Partiyası böyük siyasi təcrübəyə, geniş təşkilati şəbəkəyə və cəmiyyətdə mühüm dayaqlara malik siyasi qüvvə kimi fəaliyyət göstərir. Partiyanın qarşısında duran əsas məsələ əldə edilmiş nailiyyətlərin qorunması ilə kifayətlənməmək, yeni dövrün çağırışlarını düzgün qiymətləndirərək qarşıya qoyulan strateji hədəflərin reallaşmasına öz töhfəsini verməkdir.
Beləliklə, Yeni Azərbaycan Partiyasının VIII Qurultayında Prezident, YAP Sədri İlham Əliyevin çıxışı yalnız partiyanın gələcək fəaliyyətinə dair baxışların ifadəsi deyil, bütövlükdə Azərbaycanın yeni inkişaf mərhələsinə dair aydın siyasi mövqenin nümayişi kimi qiymətləndirilə bilər. Çıxışda səslənən fikirlər göstərir ki, Azərbaycanın qarşısında yeni və daha böyük hədəflər dayanır. Bu hədəflərin reallaşdırılması isə möhkəm dövlətçilik, milli birlik, siyasi sabitlik və cəmiyyətin bütün təbəqələrinin fəal iştirakı ilə mümkündür.
Yeni Azərbaycan Partiyasının VIII Qurultayı bu baxımdan həm partiyanın siyasi həyatında, həm də Azərbaycanın gələcək inkişaf strategiyasının müəyyənləşdirilməsi prosesində əlamətdar hadisə kimi tarixə düşür.

Kamran Əmirov,
​​​​​​​YAP Qusar rayon təşkilatının sədri