Azərbaycan və Böyük Britaniya münasibətləri: qarşılıqlı etimadın və ortaq maraqların təzahürü - ŞƏRH

Dünya siyasətində elə münasibətlər var ki, onların əhəmiyyəti yalnız bu gün əldə olunan razılaşmalarla deyil, gələcək üçün açdığı imkanlarla ölçülür. Azərbaycan ilə Böyük Britaniya arasında mövcud olan əlaqələr də məhz belə münasibətlərdəndir.Azərbaycan müstəqilliyini bərpa etdikdən sonra xarici siyasətində daim etibarlı tərəfdaşlarla əməkdaşlığın genişləndirilməsinə xüsusi önəm verib. Bu istiqamətdə Böyük Britaniya ilə qurulan əlaqələr illər ərzində siyasi və iqtisadi baxımdan mühüm əhəmiyyət qazanıb.Mən hesab edirəm ki, Azərbaycan-Böyük Britaniya münasibətlərinin əsas gücü qarşılıqlı maraqlara, etimada və hər iki dövlətin əməkdaşlıqda maraqlı olmasına əsaslanır. Xüsusilə enerji sahəsində həyata keçirilən birgə layihələr Azərbaycanın beynəlxalq mövqeyinin güclənməsində mühüm rol oynayıb. Ölkəmizin enerji təhlükəsizliyinə verdiyi töhfə artıq beynəlxalq səviyyədə qəbul edilən reallıqdır.Bu gün isə əməkdaşlığın istiqamətləri daha da genişlənir. Ticarət, investisiya, nəqliyyat, yaşıl enerji, təhsil, texnologiya və təhlükəsizlik kimi sahələrdə əldə olunan razılaşmalar münasibətlərin yeni mərhələyə keçdiyini göstərir.12 noyabr 2026-cı ildə Azərbaycan və Böyük Britaniya arasında Strateji Tərəfdaşlıq haqqında Birgə Bəyannamənin qəbul edilməsi də bu baxımdan xüsusi əhəmiyyət daşıyır. Bu sənəd iki ölkənin gələcək əməkdaşlığı üçün mühüm istiqamətlər müəyyənləşdirir.Mənim diqqətimi çəkən əsas məqamlardan biri Azərbaycanın beynəlxalq nəqliyyat dəhlizlərində artan roludur. Şərqlə Qərbi birləşdirən Orta Dəhliz ölkəmizin strateji əhəmiyyətini daha da artırır. Böyük Britaniya ilə bu sahədə əməkdaşlığın inkişafı Azərbaycanın iqtisadi imkanlarına yeni töhfələr verə bilər.
Digər tərəfdən, yaşıl enerji və müasir texnologiyalar sahəsində əməkdaşlıq gələcəyin tələblərinə uyğun addımdır. Çünki artıq dünya yalnız mövcud iqtisadi imkanlarla kifayətlənmir, eyni zamanda innovasiyalara, ekoloji təhlükəsizliyə və davamlı inkişafa üstünlük verir.Bütün bunlarla yanaşı, hesab edirəm ki, dövlətlər arasında münasibətlərin möhkəmliyi yalnız imzalanan sənədlərlə deyil, həmin sənədlərin real nəticələrə çevrilməsi ilə ölçülür. Əldə olunan razılaşmaların konkret layihələrə, yeni investisiyalara və qarşılıqlı faydalı əməkdaşlığa çevrilməsi əsas məsələdir.Azərbaycan bu gün beynəlxalq münasibətlərdə öz milli maraqlarına əsaslanan müstəqil siyasət yürüdür. Böyük Britaniya ilə əlaqələrin yeni mərhələyə qədəm qoyması da ölkəmizin beynəlxalq nüfuzunun və etibarlı tərəfdaş kimi mövqeyinin göstəricisidir.
Əminəm ki, qarşılıqlı hörmət və etimad üzərində qurulan bu əməkdaşlıq gələcəkdə daha böyük nəticələr verəcək. Çünki güclü tərəfdaşlıq yalnız bu günün deyil, həm də gələcək nəsillərin inkişafına xidmət edən mühüm amildir.

Əmir Babayev

YAP Şərur rayon təşkilatının sədri