PDF Oxu

Siyasət

  • 311

YAP dünənin, bu günün və gələcəyin partiyasıdır

YAP dünənin, bu günün və gələcəyin partiyasıdır

Yeni Azərbaycan Partiyası Azərbaycanın müasir siyasi tarixində mühüm yer tutan, ölkənin dövlətçilik ənənələrinin qorunması, milli maraqların təmin edilməsi və davamlı inkişaf strategiyasının həyata keçirilməsində xüsusi rol oynayan siyasi təşkilatdır. Partiyanın keçdiyi tarixi yol, qazandığı nailiyyətlər və qarşıya qoyduğu strateji hədəflər onun yalnız müəyyən bir dövrün siyasi təşkilatı deyil, dünənə söykənən, bu günün reallıqlarına uyğun fəaliyyət göstərən və gələcəyə istiqamətlənən ümumxalq partiyası olduğunu təsdiq edir.
Yeni Azərbaycan Partiyasının yaranması Azərbaycan xalqının mürəkkəb ictimai-siyasi proseslərdən keçdiyi, dövlət müstəqilliyinin ciddi təhlükələrlə üzləşdiyi bir tarixi şəraitə təsadüf edir. 1990-cı illərin əvvəllərində ölkədə hökm sürən siyasi böhran, idarəetmədə yaranmış boşluq, iqtisadi tənəzzül, vətəndaş qarşıdurması təhlükəsi və müstəqilliyin itirilməsi ehtimalı cəmiyyətdə güclü siyasi liderə və milli maraqları ifadə edən siyasi qüvvəyə ehtiyac yaratmışdı.
Belə bir tarixi şəraitdə xalqın böyük inam və tələbi ilə Ulu Öndər Heydər Əliyevin rəhbərliyi altında Yeni Azərbaycan Partiyasının yaradılması zərurəti meydana çıxdı. 1992-ci il noyabrın 21-də Naxçıvanda təsis olunan partiya qısa müddətdə ölkənin aparıcı siyasi qüvvəsinə çevrildi. Partiyanın yaranması, əslində, Azərbaycanın gələcək inkişaf yolunun müəyyənləşdirilməsi, dövlətçiliyin qorunması və siyasi sabitliyin təmin edilməsi istiqamətində atılmış tarixi addım idi.
Ulu Öndər Heydər Əliyevin zəngin dövlətçilik təcrübəsi, siyasi uzaqgörənliyi və xalqın ona olan sonsuz inamı Yeni Azərbaycan Partiyasının ideoloji və təşkilati əsaslarını formalaşdırdı. Partiyanın siyasi xəttinin mərkəzində müstəqil dövlətçilik, azərbaycançılıq, milli birlik, demokratik inkişaf, sosial ədalət və güclü dövlət prinsipləri dayanırdı. Bu prinsiplər zaman keçdikcə Azərbaycanın siyasi, iqtisadi və ictimai həyatında mühüm dəyişikliklərin əsasını təşkil etdi.
YAP-ın tarixə çevrilmiş fəaliyyəti sübut etdi ki, partiyanın yaradılması yalnız siyasi təşkilatlanma deyil, həm də dövlətin gələcəyinə, xalqın birliyinə və Azərbaycanın müstəqil inkişafına xidmət edən strateji seçim idi.
Yeni Azərbaycan Partiyasının dünəni, hər şeydən əvvəl, Ulu Öndər Heydər Əliyevin adı və siyasi fəaliyyəti ilə bağlıdır. Ümummilli Liderin rəhbərliyi ilə həyata keçirilən dövlət quruculuğu siyasəti Azərbaycanın müstəqilliyinin möhkəmləndirilməsinə, ölkədə siyasi sabitliyin bərqərar olmasına, iqtisadiyyatın dirçəldilməsinə və beynəlxalq mövqelərin gücləndirilməsinə geniş imkanlar yaratdı.
1993-cü ildə xalqın tələbi ilə siyasi hakimiyyətə qayıdan Heydər Əliyev ölkəni parçalanmaq və dövlət müstəqilliyini itirmək təhlükəsindən xilas edərək inkişafın yeni mərhələsinə istiqamətləndirdi. Onun rəhbərliyi ilə həyata keçirilən məqsədyönlü siyasət nəticəsində dövlət idarəçiliyinin əsasları möhkəmləndirildi, hüquqi-demokratik dövlət quruculuğu prosesi sürətləndirildi, iqtisadi islahatlara başlanıldı və Azərbaycanın beynəlxalq münasibətlər sistemində mövqeyi gücləndirildi.
Ulu Öndərin müəllifi olduğu neft strategiyası, xüsusilə 1994-cü ildə imzalanmış “Əsrin müqaviləsi” ölkənin iqtisadi inkişafının uzunmüddətli əsaslarını formalaşdırdı. Bu strategiya Azərbaycanın enerji təhlükəsizliyində və beynəlxalq iqtisadi münasibətlərdə mühüm tərəfdaş kimi tanınmasına şərait yaratdı.
Heydər Əliyevin siyasi irsinin ən mühüm xüsusiyyətlərindən biri milli maraqların hər şeydən üstün tutulması, dövlətçilik ənənələrinin qorunması və xalq-iqtidar birliyinin möhkəmləndirilməsi idi. Məhz bu prinsiplər Yeni Azərbaycan Partiyasının fəaliyyətinin ideoloji əsasına çevrildi.
Partiyanın sonrakı inkişafı da bu siyasi kursun ardıcıl davam etdirilməsi ilə bağlıdır. Ulu Öndərin müəyyən etdiyi strateji istiqamətlər Azərbaycanın bugünkü qüdrətinin, iqtisadi potensialının və siyasi nüfuzunun formalaşmasında müstəsna əhəmiyyətə malikdir. Bu baxımdan YAP-ın dünəni Azərbaycanın müasir dövlətçilik tarixinin mühüm bir mərhələsini təşkil edir.
Yeni Azərbaycan Partiyasının bugünkü fəaliyyəti Azərbaycan Respublikasının Prezidenti, Partiyanın Sədri cənab İlham Əliyevin rəhbərliyi ilə həyata keçirilən müasir dövlətçilik siyasəti və yeni inkişaf strategiyası ilə sıx bağlıdır.
2003-cü ildən etibarən Prezident İlham Əliyevin rəhbərliyi ilə Azərbaycanın siyasi, iqtisadi, sosial və hərbi potensialı əhəmiyyətli dərəcədə gücləndirilib. Dövlət idarəçiliyində müasir yanaşmalar tətbiq olunub, iqtisadiyyatın şaxələndirilməsi istiqamətində genişmiqyaslı islahatlar aparılıb, infrastruktur layihələri həyata keçirilib, ölkənin müdafiə qabiliyyəti yüksəldilib. Bütün bunlar Azərbaycanın beynəlxalq nüfuzunun artmasına və milli maraqlarını qətiyyətlə müdafiə edən güclü dövlətə çevrilməsinə zəmin yaradıb.
Bu inkişafın ən mühüm tarixi nəticəsi Azərbaycanın ərazi bütövlüyünün və dövlət suverenliyinin tam bərpa edilməsidir. 2020-ci il sentyabrın 27-də başlayan və 44 gün davam edən Vətən müharibəsində Azərbaycan Ordusunun qazandığı tarixi Zəfər xalqımızın çoxəsrlik dövlətçilik tarixinin ən şanlı səhifələrindən biri oldu. Müzəffər Ali Baş Komandan İlham Əliyevin qətiyyətli rəhbərliyi, ordumuzun qəhrəmanlığı və xalqımızın sarsılmaz birliyi nəticəsində torpaqlarımız işğaldan azad edildi. 2023-cü ilin sentyabrında həyata keçirilmiş lokal antiterror tədbirləri ilə ölkəmizin bütün ərazisində dövlət suverenliyi tam təmin olundu.
Bu tarixi nailiyyətlər Yeni Azərbaycan Partiyasının siyasi ideallarının, dövlətçilik mövqeyinin və milli maraqlara əsaslanan fəaliyyətinin real nəticələrini də nümayiş etdirdi.
2026-cı il oktyabrın 2-də Bakıda, Heydər Əliyev Mərkəzində keçirilən Yeni Azərbaycan Partiyasının VIII Qurultayı məhz bu tarixi reallıqlar fonunda xüsusi siyasi əhəmiyyət daşıdı. Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin qurultaydakı nitqi partiyanın keçdiyi tarixi yolun qiymətləndirilməsi ilə yanaşı, Azərbaycanın yeni inkişaf mərhələsində qarşıda duran strateji vəzifələrin müəyyənləşdirilməsi baxımından mühüm proqram xarakteri daşıdı.
Prezident İlham Əliyev çıxışında Yeni Azərbaycan Partiyasının ölkənin ictimai-siyasi həyatındakı rolunu yüksək qiymətləndirərək onun təkcə Azərbaycanın deyil, bütövlükdə Cənubi Qafqazın ən böyük siyasi qüvvəsi olduğunu vurğuladı. Dövlətimizin başçısı partiyanın 30 ildən artıq müddətdə hakim siyasi qüvvə kimi fəaliyyət göstərdiyini, ölkənin uğurlu və şərəfli inkişaf yolunda partiya fəallarının mühüm töhfələrinin olduğunu diqqətə çatdırdı.
VIII Qurultayın mühüm tarixi xüsusiyyətlərindən biri də Azərbaycanın ərazi bütövlüyünü və suverenliyini tam bərpa etməsindən sonra keçirilən ilk qurultay olması idi. Dövlətimizin başçısı bu məqamı xüsusi vurğulayaraq Azərbaycanın yeni geosiyasi reallıqlar şəraitində fəaliyyət göstərdiyini diqqətə çatdırdı.
Prezident İlham Əliyevin qurultaydakı çıxışında səsləndirdiyi fikirlər göstərdi ki, əldə edilmiş tarixi Zəfər Azərbaycanın inkişaf yolunun son nöqtəsi deyil, yeni və daha genişmiqyaslı hədəflərə doğru irəliləyişinin başlanğıcıdır. Artıq qarşıda dayanan əsas vəzifə qazanılmış nailiyyətləri qorumaq, dövlətin gücünü daha da artırmaq, iqtisadi və sosial inkişafı sürətləndirmək, Qarabağ və Şərqi Zəngəzurun bərpasını başa çatdırmaqdır.
Dövlətimizin başçısı müdafiə və təhlükəsizlik məsələlərinin daim diqqət mərkəzində saxlanılmasının vacibliyini xüsusi qeyd etdi. O bildirdi ki, Azərbaycan istənilən hərbi təxribatın qarşısını almaq üçün kifayət qədər güclü olmalıdır. Bu məqsədlə müdafiə potensialının gücləndirilməsi, müasir hərbi texnologiyaların tətbiqi və ordunun döyüş qabiliyyətinin yüksəldilməsi dövlət siyasətinin əsas prioritetlərindəndir. Prezidentin çıxışında 2027-ci ilin dövlət büdcəsində müdafiə və təhlükəsizlik məqsədləri üçün təqribən 9 milyard manat vəsaitin nəzərdə tutulması da bu istiqamətə verilən əhəmiyyətin göstəricisi kimi təqdim edildi.
Qurultayda Azərbaycanın müstəqil xarici siyasət kursu da geniş şəkildə diqqətə çatdırıldı. Prezident İlham Əliyev ölkəmizin beynəlxalq münasibətlər sistemində qazandığı etimadın, siyasi nüfuzun və tərəfdaşlıq əlaqələrinin milli maraqlara əsaslanan ardıcıl siyasətin nəticəsi olduğunu vurğuladı. Çin Xalq Respublikası və Amerika Birləşmiş Ştatları ilə strateji tərəfdaşlıq münasibətlərinin qurulması Azərbaycanın beynəlxalq mövqeyinin güclənməsinin mühüm göstəriciləri kimi qeyd olundu.
Qurultayda səsləndirilən fikirlər bir daha təsdiq etdi ki, Azərbaycan heç bir xarici siyasi mərkəzdən asılı olmadan, öz milli maraqlarına uyğun müstəqil qərarlar qəbul edən dövlətdir. Bu siyasi xətt ölkəmizin beynəlxalq nüfuzunun qorunması, yeni tərəfdaşlıqların qurulması və regional əməkdaşlığın inkişafı baxımından mühüm əhəmiyyət daşıyır.
Digər mühüm istiqamət Qarabağ və Şərqi Zəngəzurun bərpası, Böyük Qayıdış proqramının davam etdirilməsi və həmin ərazilərdə dayanıqlı yaşayışın təmin olunmasıdır. Bu gün işğaldan azad edilmiş ərazilərdə genişmiqyaslı quruculuq işləri aparılır, müasir infrastruktur yaradılır, yaşayış məntəqələri yenidən qurulur, iqtisadi və sosial layihələr həyata keçirilir. Məqsəd həmin əraziləri ölkənin ən müasir və inkişaf etmiş bölgələrindən birinə çevirmək, keçmiş məcburi köçkünlərin doğma yurdlarına təhlükəsiz və layiqli qayıdışını təmin etməkdir.
Beləliklə, Yeni Azərbaycan Partiyasının bu günü müstəqil, qalib və güclü Azərbaycanın siyasi inkişafı ilə vəhdət təşkil edir. Partiyanın fəaliyyəti dövlətçilik ideyalarının təbliği, ictimai-siyasi sabitliyin qorunması, milli birliyin möhkəmləndirilməsi və ölkənin qarşısında duran strateji vəzifələrin həyata keçirilməsinə ictimai dəstəyin gücləndirilməsi baxımından mühüm əhəmiyyət daşıyır.
Yeni Azərbaycan Partiyasının gələcək inkişaf perspektivləri Azərbaycanın qarşısında dayanan uzunmüddətli strateji hədəflərlə birbaşa bağlıdır.
VIII Qurultayda Prezident İlham Əliyevin səsləndirdiyi fikirlər bu baxımdan Yeni Azərbaycan Partiyasının gələcək fəaliyyət istiqamətlərinin müəyyənləşdirilməsi üçün mühüm yol xəritəsi oldu. Dövlətimizin başçısının çıxışında əsas diqqət Azərbaycanın müstəqilliyinin və təhlükəsizliyinin qorunmasına, iqtisadi qüdrətinin artırılmasına, sosial rifahın yüksəldilməsinə, milli maraqların beynəlxalq müstəvidə müdafiəsinə, Qarabağ və Şərqi Zəngəzurun inkişafına, eləcə də partiyanın müasir dövrün tələblərinə uyğun fəaliyyət göstərməsinə yönəldildi.
Gələcək mərhələdə YAP-ın qarşısında dayanan mühüm vəzifələrdən biri ideoloji fəaliyyətin daha da gücləndirilməsidir. Çünki müasir dünyada informasiya texnologiyalarının sürətli inkişafı, sosial şəbəkələrin ictimai rəyə təsiri və müxtəlif ideoloji təhdidlərin artması milli-mənəvi dəyərlərin qorunmasını, dövlətçilik düşüncəsinin gənc nəsil arasında möhkəmləndirilməsini xüsusi aktuallıq kəsb edən məsələlərə çevirir.
Bu baxımdan partiya üzvlərinin və fəallarının üzərinə mühüm məsuliyyət düşür. Onlar dövlətin həyata keçirdiyi siyasətin mahiyyətini, Azərbaycanın qazandığı tarixi nailiyyətləri, milli maraqların qorunması istiqamətində görülən işləri cəmiyyətə düzgün və obyektiv şəkildə çatdırmalı, xüsusilə gənclərin siyasi və ictimai fəallığının artırılmasına töhfə verməlidirlər.
Prezident İlham Əliyevin VIII Qurultaydakı çıxışında partiyanın ideoloji fəaliyyətinin müasir tələblərə uyğun qurulması, formal və şablon yanaşmalardan uzaqlaşaraq daha çevik, təsirli və nəticəyönümlü fəaliyyət mexanizmlərinin tətbiqi məsələləri də diqqətə çatdırıldı. Bu yanaşma göstərir ki, Yeni Azərbaycan Partiyası yalnız keçmiş nailiyyətləri ilə kifayətlənməməli, daim yenilənməli, dəyişən ictimai münasibətlərə və informasiya mühitinə uyğunlaşmalıdır.
Gənclərlə işin genişləndirilməsi də partiyanın gələcək fəaliyyətində xüsusi əhəmiyyət daşıyır. Gənc nəslin dövlətçilik ənənələrinə sadiq, milli-mənəvi dəyərlərə bağlı, müasir bilik və bacarıqlara yiyələnmiş vətəndaşlar kimi formalaşması Azərbaycanın davamlı inkişafının əsas şərtlərindəndir. Bu istiqamətdə gənclərin təşəbbüslərinin dəstəklənməsi, onların idarəetmə və ictimai proseslərdə iştirakının genişləndirilməsi, intellektual potensiallarının üzə çıxarılması vacib məsələlərdəndir.
Partiyanın gələcək fəaliyyətində digər mühüm istiqamət əhali ilə birbaşa ünsiyyətin genişləndirilməsi və vətəndaş müraciətlərinə həssas münasibətin təmin edilməsidir. YAP-ın gücü yalnız onun çoxsaylı üzvləri və təşkilati strukturları ilə deyil, həm də cəmiyyətlə qurduğu etibarlı münasibətlər, insanların problemlərinə göstərdiyi diqqət və ictimai təşəbbüslərə verdiyi dəstəklə ölçülür.
Bu mənada rayon və şəhər təşkilatlarının, ərazi partiya təşkilatlarının fəaliyyəti xüsusi əhəmiyyət kəsb edir. Yerli təşkilatlar partiyanın ideoloji xəttinin cəmiyyətə çatdırılmasında, dövlət siyasətinin izahında, əhali ilə qarşılıqlı əlaqələrin qurulmasında və ictimai fəallığın artırılmasında mühüm rol oynayırlar. Onların fəaliyyəti müasir informasiya vasitələrindən səmərəli istifadə, şəffaflıq, operativlik və konkret nəticələrə əsaslanmalıdır.
Yeni Azərbaycan Partiyasının ümummilli səviyyədə müəyyənləşdirdiyi strateji məqsədlərin həyata keçirilməsində yerli təşkilatların üzərinə də mühüm vəzifələr düşür. Bu baxımdan YAP Laçın rayon təşkilatının fəaliyyəti partiyanın ideoloji prinsiplərinin təbliği, dövlətçilik ənənələrinin qorunması, ictimai-siyasi fəallığın artırılması və əhali ilə işin gücləndirilməsi istiqamətində ardıcıl şəkildə qurulmalıdır.
Laçın rayonunun tarixi, mədəni irsi, Vətən müharibəsində göstərdiyi qəhrəmanlıq və Böyük Qayıdış prosesində tutduğu mövqe rayon təşkilatının ideoloji-maarifləndirmə fəaliyyətinə xüsusi məzmun verir. Laçının azad olunması, doğma yurda qayıdışın təmin edilməsi və rayonda genişmiqyaslı bərpa-quruculuq işlərinin aparılması Azərbaycan dövlətinin qüdrətinin və Prezident İlham Əliyevin qətiyyətli siyasətinin əyani təzahürüdür.
YAP Laçın rayon təşkilatı da öz fəaliyyətində bu tarixi reallıqları əsas götürərək partiya üzvləri, şəhid ailələri, qazilər, müharibə veteranları, ziyalılar, gənclər və ictimaiyyət nümayəndələri ilə əlaqələrin genişləndirilməsinə xüsusi diqqət yetirməlidir. Eyni zamanda, partiya üzvlərinin siyasi maarifləndirilməsi, Ulu Öndər Heydər Əliyevin zəngin dövlətçilik irsinin və Prezident İlham Əliyevin müasir inkişaf strategiyasının təbliği istiqamətində tədbirlərin təşkili mühüm əhəmiyyət daşıyır.
VIII Qurultayda müəyyənləşdirilən vəzifələrin yerli səviyyədə həyata keçirilməsi üçün hər bir partiya üzvü öz fəaliyyətində məsuliyyət, təşəbbüskarlıq və vətənpərvərlik nümayiş etdirməlidir. Partiya üzvü olmaq yalnız təşkilati mənsubiyyət deyil, həm də dövlətin və xalqın qarşısında məsuliyyət daşımaq, milli maraqların müdafiəsinə töhfə vermək deməkdir.
Yeni Azərbaycan Partiyasının 34 illik tarixi Azərbaycan dövlətçiliyinin möhkəmlənməsi, siyasi sabitliyin təmin olunması, iqtisadi inkişafın sürətlənməsi və milli maraqların müdafiəsi ilə sıx bağlıdır. Bu tarix xalqın iradəsinə, Ulu Öndər Heydər Əliyevin müdrik siyasi irsinə və Prezident İlham Əliyevin qətiyyətli rəhbərliyinə əsaslanan ardıcıl inkişaf yoludur.
Partiyanın dünəni dövlət müstəqilliyinin qorunması və möhkəmləndirilməsi uğrunda mübarizənin, bu günü tarixi Zəfər qazanmış Azərbaycanın inkişafının, gələcəyi isə daha güclü, qüdrətli və rəqabətqabiliyyətli dövlət quruculuğunun siyasi əsaslarını özündə birləşdirir.
2026-cı il oktyabrın 2-də keçirilmiş VIII Qurultay bu tarixi yolun yeni mərhələsini müəyyənləşdirən mühüm siyasi hadisə kimi yadda qaldı. Qurultayda Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin səsləndirdiyi fikirlər partiyanın qarşısında dayanan vəzifələri, dövlətimizin gələcək inkişaf istiqamətlərini və milli maraqlarımızın qorunması ilə bağlı prioritetləri aydın şəkildə ortaya qoydu.
Ən başlıcası, VIII Qurultayın siyasi məzmunu bir daha göstərdi ki, Azərbaycanın əldə etdiyi nailiyyətlər təsadüfi deyil, möhkəm təməllərə, düzgün müəyyənləşdirilmiş strateji hədəflərə və ardıcıl dövlət siyasətinə əsaslanır. Bu siyasətin əsas dayaqlarından biri olan Yeni Azərbaycan Partiyası da öz fəaliyyətini müasir dövrün çağırışlarına uyğun quraraq ölkənin gələcək inkişafına töhfə vermək əzmindədir.
Bu gün YAP-ın qarşısında yalnız əldə olunmuş uğurları qorumaq deyil, həm də yeni nailiyyətlərə imza atmaq, milli birliyi daha da möhkəmləndirmək, gənc nəslin dövlətçilik ideyalarına sədaqətini artırmaq və Azərbaycanın beynəlxalq nüfuzunun yüksəlməsinə siyasi-ictimai dəstək vermək kimi mühüm vəzifələr dayanır.
Əminliklə demək olar ki, Ulu Öndər Heydər Əliyevin müəyyən etdiyi siyasi kursun Prezident İlham Əliyev tərəfindən müasir dövrün tələblərinə uyğun uğurla davam etdirilməsi Yeni Azərbaycan Partiyasının gələcək fəaliyyətinin də əsas istiqamətini təşkil edəcəkdir.
YAP dünənin tarixi zərurətindən doğan, bu gün Azərbaycanın siyasi və ictimai həyatında aparıcı mövqeyə malik olan, gələcəyin isə güclü və müasir Azərbaycanının inkişafına xidmət edən partiyasıdır. Bu baxımdan “YAP dünənin, bu günün və gələcəyin partiyasıdır” ifadəsi sadəcə siyasi şüar deyil, partiyanın keçdiyi tarixi yolun, qazandığı nailiyyətlərin və gələcək strateji hədəflərinin məntiqi ifadəsidir.

Şamo Qasımov
YAP Laçın rayon təşkilatının sədr müavini

Digər xəbərlər