Elm qara zirənin müalicəvi xüsusiyyətlərini təsdiqləyib...

...Müalicəvi xüsusiyyətləri olan qara zirə toxumu və yağının effektivliyi müxtəlif ölkələrin alimləri tərəfindən sübut edilmişdir.

SİA bu barədə xarici qaynaqlara istinad edir.

Bu bitkiyə əsaslanan preparatlar damar və endokrin xəstəliklərin müalicəsində kömək edir.

Osaka Metropolitan Universitetinin yapon alimləri klinik tədqiqat aparıblar: yüksək xolesterolu olan 42 artıq çəkili könüllü iki ay ərzində gündə 5 qram (təxminən bir çay qaşığı) üyüdülmüş qara zirə toxumu qəbul ediblər.

Təcrübə nəticəsində iştirakçıların "pis" xolesterol (LDL) və triqliserid səviyyələri azalıb, "yaxşı" xolesterol (HDL) səviyyələri isə artıb.

Hüceyrə təcrübələrində qara zirə ekstraktı yağ damlalarının yığılmasını 40 faizdən çox azaldaraq yağ hüceyrələrinin əmələ gəlməsini maneə törədib.

Tədqiqatçıların fikrincə, bu, qara zirəni piylənmənin və əlaqəli ürək-damar xəstəliklərinin qarşısının alınması üçün perspektivli bir məhsula çevirir.

"Life" elmi jurnalında dərc olunmuş bir araşdırma qara zirənin 2-ci tip diabetin kompleks terapiyasına uğurla daxil edilə biləcəyini təsdiqləyir.

Bitkinin aktiv komponentləri qan qlükoza səviyyəsini aşağı salmağa kömək edir və bununla da qlikozlaşmış hemoglobin (HbA1c) səviyyəsini azaldır, həmçinin insulin istehsalından məsul olan mədəaltı vəzi beta hüceyrələrini qoruyur.

2025-ci ildə laboratoriya heyvanları üzərində aparılan bir araşdırmada qara zirə ekstraktı qan qlükoza səviyyəsini 47,7 faiz azaltmış, eyni zamanda "pis" xolesterolu və triqliseridləri azaltmışdır.

Qara zirənin digər vacib xüsusiyyəti mədə mukozasını qorumaq qabiliyyətidir.

..."Saudi Journal of Gastroenterology" jurnalında dərc olunmuş bir araşdırmada toxumların sulu suspenziyasının zərərli maddələrdən qorunma təmin etdiyi aşkar edilmişdir: mədə turşuluğunu dörd dəfədən çox azaldır və qoruyucu selik istehsalını artırır.

Bu xüsusiyyətinə görə qara zirə uzun müddətdir ənənəvi tibbdə mədə-bağırsaq problemləri üçün istifadə olunur.

Nazlı Almuradova