Beyn qocalmasının ən güclü katalizatoru müəyyən edilib...

...Hətta kiçik dozada spirtli içkilər belə müntəzəm qəbul edildikdə beynin qocalmasını sürətləndirir.

SİA-nın rus saytlarından əldə etdiyi məlumata görə, narkoloq Andrey Tyurin verdiyi müsahibədə bunu bildirib. Mütəxəssisin sözlərinə görə, insanlar beyninin necə qocaldığını hiss etmirlər və spirtli içki bu prosesdə əsas amildir.

...Mütəmadi spirtli içki qəbulu yaşla bağlı beyin atrofiyasını iki-üç dəfə sürətləndirir. Yəni, 40 yaşlı bir insanın beyninin MRT müayinəsi 60 yaşlı bir insanınkı ilə eyni vəziyyəti göstərə bilər, - Tyurin bildirib.

O izah edib ki, etanol neyrotoksin kimi çıxış edir və zamanla sinir hüceyrələrini məhv edir.

Yaddaş və duyğulardan məsul olan hipokampus xüsusilə təsirlənir. Alkoqol həmçinin beynin ağ maddəsinə zərər verir, siqnal ötürülməsini pozur.

Nəticədə reaksiya müddəti yavaşlayır, koordinasiya pozulur və birdən çox tapşırıq yerinə yetirmək çətinləşir və bu simptomlar spirtli içki olmadan da baş verə bilər.

...MRT tədqiqatları göstərir ki, gündə bir stəkan şərab və ya bir şüşə pivə içən insanlarda ağ maddənin bütövlüyü cəmi beş-altı ildən sonra 15-20 faiz azalır. Bu, damar demensiyasına birbaşa yoldur, - deyə asılılıq üzrə mütəxəssis xəbərdarlıq edib.

Bundan əlavə, müntəzəm spirtli içki qəbulu bioloji yaşın göstəricisi olan telomerlərin qısalmasını sürətləndirir və gənc neyronların ölümünü artırır.

Həkim əlavə edib ki, bu, öyrənmə və uyğunlaşma qabiliyyətini azaldır, həmçinin əhval-ruhiyyənin kəskin dəyişkənliyinə səbəb olur.

Əli Babayev