20 Yanvar – azadlığa gedən yolun başlanğıcı - ŞƏRH

1990-cı ilin 20 Yanvar hadisələri Azərbaycan xalqının tarixində dərin iz buraxan, siyasi və mənəvi baxımdan dönüş nöqtəsi olan bir faciədir. Həmin gecə sovet hakimiyyəti öz vətəndaşına qarşı silah qaldıraraq, güc yolu ilə milli iradəni susdurmağa cəhd göstərdi. Bakı şəhərinə yeridilən hərbi birliklər planlı şəkildə dinc əhalini hədəfə aldı və nəticədə onlarla insan həyatını itirdi.

Bu qırğın təkcə fiziki məhvetmə aktı deyildi, həm də xalqın şüuruna, milli kimliyinə və azad seçim hüququna qarşı yönəlmiş zorakılıq idi. İnformasiya blokadası, fövqəladə vəziyyətin gec elan olunması və xəbərdarlıq edilmədən hərbi texnikanın küçələrə çıxarılması hadisənin məqsədli xarakter daşıdığını açıq şəkildə göstərirdi.

20 Yanvar hadisələri eyni zamanda Azərbaycan cəmiyyətində siyasi yetkinliyin formalaşmasına təkan verdi. Xalq başa düşdü ki, onun taleyi yalnız öz iradəsi ilə müəyyən oluna bilər. Faciədən sonra milli həmrəylik gücləndi, müstəqillik ideyası ümumxalq tələbinə çevrildi və geri dönüşü olmayan proses başladı.

Bu hadisələrə ilk ciddi siyasi münasibət xalqın səsini dünyaya çatdıran lider mövqeyi ilə verildi və sonrakı dövrdə müstəqil Azərbaycan dövləti 20 Yanvar qırğınına hüquqi-siyasi qiymət verdi. Şəhidlərin xatirəsi dövlət səviyyəsində uca tutuldu, bu gün onların adı müstəqilliyimizin mənəvi dayağı kimi ehtiramla yad edilir.

20 Yanvar tarixdə yalnız faciə kimi deyil, həm də azadlıq yolunda ödənilən ağır bədəl kimi yaşayır. Bu qanlı gecə sübut etdi ki, zor gücü ilə idarə olunan sistemlər mütləq süquta uğrayır, xalqın azadlıq istəyi isə gec-tez qalib gəlir. Qanlı Yanvar Azərbaycan xalqının sarsılmaz iradəsinin və gələcəyə inamının rəmzidir.

Rauf Nəcəfov

YAP Sədərək rayon təşkilatının məsləhətçisi