Hollivud ulduzları süni intellekt əleyhinə müharibəyə başladılar..?

...Skarlet Yohansson və Keyt Blanşett də daxil olmaqla Hollivud ulduzları texnologiya şirkətlərini sərt tənqid edərək, onları süni intellekt modellərini yetişdirmək üçün işlərini "oğurlamaqda" ittiham ediblər. Onlar "Oğurluq innovasiya deyil" adlı açıq məktub imzalayıblar.

SİA-nın əldə etdiyi məlumata görə, bu barədə Independent yazır.

İmza atanların arasında "Breaking Bad"ın yaradıcısı Vins Qilliqan, aktyorlar Cozef Qordon-Levitt və Oliviya Mann və yazıçı Conatan Franzen də var.

Məktubda Amerika yaradıcı icmasının ölkə iqtisadiyyatında əsas rol oynadığı, lakin böyük texnologiya şirkətlərinin onların işlərindən icazəsiz və ya müəllif hüquqları olmadan istifadə etdiyi iddia edilir.

Bəyanatda deyilir ki, "...işimizi oğurlamaq irəliləyiş və ya innovasiya deyil. Bu, oğurluqdur, nöqtə".

Məktub müəllifləri etik alternativin olduğunu vurğulayırlar: bəzi süni intellekt şirkətlərinin artıq istifadə etdiyi lisenziyalaşdırma müqavilələri və tərəfdaşlıqlar. Onların fikrincə, süni intellektin inkişafı məzmun yaradıcılarının hüquqlarını pozmadan mümkündür.

Nazlı Almuradova