Beynəlxalq dialoq üçün mühüm platforma - ŞƏRH

12 mart tarixində Bakıda yerləşən Gülüstan Sarayında keçirilən XIII Qlobal Bakı Forumu dünyanın müxtəlif ölkələrindən siyasətçiləri, ekspertləri və beynəlxalq təşkilat nümayəndələrini bir araya gətirib. Forum Prezident İlham Əliyevin himayəsi ilə və Nizami Gəncəvi Beynəlxalq Mərkəzinin təşkilatçılığı ilə təşkil olunub.

“Keçid dövründə olan dünyada fikir ayrılıqlarının aradan qaldırılması” mövzusu ilə keçirilən forum müasir dövrdə beynəlxalq münasibətlərdə dialoqun və əməkdaşlığın nə qədər vacib olduğunu bir daha nümayiş etdirir. Dünyada baş verən siyasi gərginliklər, iqtisadi dəyişikliklər və regional münaqişələr dövlətlər arasında qarşılıqlı anlaşma və birgə fəaliyyətə ehtiyacı artırır.

Forumun açılış mərasimində çıxış edən Prezident İlham Əliyev qlobal problemlərin yalnız əməkdaşlıq və qarşılıqlı hörmət prinsipləri əsasında həll edilə biləcəyini vurğulayıb. O qeyd edib ki, Azərbaycan müxtəlif beynəlxalq platformalarda dialoq və əməkdaşlığın təşviqinə daim xüsusi diqqət yetirir.

Qlobal Bakı Forumu illər ərzində dünya liderləri və tanınmış siyasi xadimlərin fikir mübadiləsi apardığı nüfuzlu beynəlxalq tədbirlərdən birinə çevrilib. Bu forum çərçivəsində qlobal təhlükəsizlik, enerji siyasəti, iqlim dəyişiklikləri, regional sabitlik və iqtisadi əməkdaşlıq kimi mühüm məsələlər müzakirə olunur.

Tədbir həmçinin Azərbaycanın beynəlxalq münasibətlər sistemində artan rolunu nümayiş etdirir. Bakı artıq uzun müddətdir ki, müxtəlif beynəlxalq konfranslara və qlobal müzakirələrə ev sahibliyi edən mühüm diplomatik mərkəzlərdən biri kimi tanınır.

XIII Qlobal Bakı Forumunun əsas məqsədi qlobal problemlərin müzakirəsi üçün açıq və səmərəli dialoq mühiti yaratmaqdır. Bu baxımdan forum müxtəlif ölkələr arasında qarşılıqlı anlaşmanın möhkəmlənməsinə və yeni əməkdaşlıq imkanlarının formalaşmasına mühüm töhfə verir.

Çingiz İbrahimov

YAP Göyçay rayon təşkilatının əməkdaşı