“Bu, xərçəngi 100 dəfə sürətləndirir...”

...Kaliforniya Universitetinin Los-Ancelesdəki tədqiqatçıları xolesterol səviyyəsi ilə xərçəng hüceyrələrinin aktivliyi arasında əvvəllər məlum olmayan bir əlaqə aşkar ediblər.

SİA xəbər verir ki, onların tədqiqatının nəticələri Cell Stem Cell jurnalında dərc edilib.

Laboratoriya siçanları üzərində aparılan təcrübələrdə alimlər bağırsaq toxumasındakı dəyişiklikləri araşdırıblar.

Heyvanlar iki qrupa bölünüb: bir qrupda xolesterol səviyyəsi qidalanma yolu ilə, digərində isə onun istehsalı genetik olaraq artırılıb.

Hər iki halda alimlər bağırsaq kök hüceyrələrinin sürətlənmiş bölünməsini və daha intensiv şiş böyüməsini müşahidə ediblər.

...Biz aşkar etdik ki, xolesterol bağırsaqdakı kök hüceyrələrinin böyüməsinə təsir göstərir və bu da öz növbəsində xərçəng əmələ gəlmə sürətini 100 dəfədən çox sürətləndirir, - deyə Kaliforniya Universitetinin Los-Ancelesdəki patologiya və tibb professoru və tədqiqatın aparıcı müəllifi Peter Tontonoz bildirib.

Müəlliflər hesab edirlər ki, yeni tapıntıları yoğun bağırsaq xərçəngi də daxil olmaqla mədə-bağırsaq xəstəlikləri üçün daha effektiv müalicə üsullarının hazırlanmasına kömək edə bilər.

Mütəxəssislər vurğulayırlar ki, xolesterolu tamamilə aradan qaldırmaq nə mümkün, nə də zəruridir, çünki bu, hormonların, D vitamininin istehsalı və hüceyrə membranlarının əmələ gəlməsi üçün lazımdır.

Həkimlər həmçinin "yaxşı" və "pis" xolesterol arasındakı fərqi vurğulayırlar. Yüksək sıxlıqlı lipoproteinlər bədən üçün daha təhlükəsiz hesab olunur, aşağı sıxlıqlı lipoproteinlərin yüksək səviyyəsi isə artan sağlamlıq riskləri ilə əlaqələndirilir.

Amerika Xərçəng Tədqiqatları İnstitutu qeyd edir ki, xolesterolla zəngin pəhrizdə çox vaxt çoxlu miqdarda qırmızı və emal olunmuş ət olur ki, bu da xərçəngin inkişaf riskini artıra bilər.

Daha sağlam alternativ olaraq, mütəxəssislər yağsız ət, az yağlı süd məhsulları və dəniz məhsulları ilə orta dərəcədə pəhriz tövsiyə edirlər.

Nazlı Almuradova