"Johnson Baby"da xərçəng izi: 5.5 milyard dollar təzminat ödəyəcək

ABŞ-ın səhiyyə nəhəngi Johnson & Johnson (J&J) şirkəti talk əsaslı uşaq pudrası və digər talk tərkibli məhsullarının yumurtalıq xərçənginə səbəb olduğu iddiaları ilə bağlı qalan on minlərlə məhkəmə işini həll etmək üçün 5,5 milyard ABŞ dolları məbləğində razılaşma əldə etdiyini açıqlayıb. Razılaşma təxminən 76 min iddianı əhatə edir və son on ildən artıqdır davam edən hüquqi mübahisələrə son qoya bilər.

Şirkətin bildirdiyinə görə, razılaşmanın qüvvəyə minməsi üçün iddiaçıların ən azı 95 faizinin onu qəbul etməsi tələb olunur. Bu şərt yerinə yetirilərsə, məhkəmə çəkişmələrinin böyük hissəsi yekunlaşacaq.

Johnson & Johnson uzun illərdir məhsullarının təhlükəsiz olduğunu, onların tərkibində asbest olmadığını, elmi araşdırmaların uşaq pudra və masaj yağı məhsulları ilə yumurtalıq xərçəngi arasında əlaqənin təsdiqləmədiyini bildirir. Buna baxmayaraq, şirkət mübahisələri uzatmamaq və hüquqi qeyri-müəyyənliyi aradan qaldırmaq məqsədilə razılaşmaya getdiyini qeyd edib.

Razılaşma həm də son məhkəmə qərarlarından sonra gündəmə gəlib. ABŞ-da federal hakim iddiaçıların bəzi ekspert sübutlarının etibarlılığı ilə bağlı ciddi suallar qaldırmışdı ki, bu da Johnson & Johnson-un hüquqi mövqeyini gücləndirmişdi.

Şirkət daha əvvəl də bu iddiaları iflas proseduru vasitəsilə həll etməyə çalışmışdı, lakin məhkəmələr həmin cəhdləri qəbul etməmişdi. Hazırkı razılaşma isə məhkəmədənkənar həll yolu kimi təqdim olunur və qəbul edilərsə, ABŞ-da talk məhsulları ilə bağlı qalan iddiaların demək olar ki, hamısını əhatə edəcək.