Pentaqon: Rusiya bioloji silah hazırlayır

Pentaqon bioloji təhlükələrə qarşı müdafiə vəziyyəti haqqında hesabat hazırlayıb. Hesabatda Pentaqon Rusiya və Şimali Koreyanın aktiv hücum xarakterli bioloji silah proqramlarını dəstəklədiyini göstərir.

Hesabatda Çin, Rusiya, Şimali Koreya və İranın ölümcül toksinlər və patogenlər yaratmağa davam etdiyi və "həm sintetik biologiya, həm də peptid sintezi sahəsində irəliləyişlərin xalqlara geniş çeşiddə yeni toksinlər hazırlamağa imkan verə biləcəyi" qeyd edilir.

Hesabatda deyilir: “İctimai sağlamlığı ilə bağlı dezinformasiya bütün COVID-19 pandemiyası zamanı özünü büruzə verib və Rusiyanın 2022-ci ildə Ukraynada hərbi əməliyyatlara başlamasından bəri davam edib”.

Pentaqon onu da qeyd edir ki, Rusiya sovet biosilah proqramlarının davam etdirilməsini tam olaraq qəbul etmir, onların məhdudlaşdırılmasına dair sübut təqdim etmir və ikili məqsədli bioloji tədqiqatları gizlətməyə davam edir.

İcmal həmçinin bildirir ki, bu, ABŞ ordusu üçün biomüdafiə sahəsində həlledici məqamdır və onlar bioloji silahların inkişafı və pandemiya da daxil olmaqla digər fəlakətli hadisələrlə mübarizə aparmaq üçün tez və qətiyyətlə hərəkət etməlidirlər. Sənəddə həmçinin İran və zorakı ekstremist təşkilatların artan təhlükəsi vurğulanır.

Rusiya da öz növbəsində ABŞ-ı bioloji silah hazırlamaqda ittiham edir. İki gün əvvəl, avqustun 16-da Rusiya silahlı qüvvələrinin radiasiya, kimyəvi və bioloji müdafiə qoşunlarının rəisi, general-leytenant İqor Kirillov ABŞ-ın yeni pandemiyaya hazırlaşdığını bildirib.