Dünyanın mərmiləri bitdi - Ukraynanın Baş naziri

Ukraynanın baş naziri Denis Şmıqal hesab edir ki, təkcə onun ölkəsində deyil, bütün dünyada sursat çatışmazlığı var. "Səs" qəzeti baş nazirə istinadən yazır ki, problemi həll etmək üçün onların istehsalını Ukraynada qurmaq lazımdır.

“Bizim təkcə Ukraynada deyil, bütün dünyada sursat çatışmazlığımız var. Biz başa düşürük ki, biz onları burada, Ukraynada istehsal etməliyik, çünki bütün dünyada mərmilər, ehtiyatlar tükənib. Bütün anbarlar boşdur”, cənab Şmıqal Financial Times-a (FT) bildirib.

Ukraynanın strateji sənaye naziri Aleksandr Kamışin hesab edir ki, tam müstəqilliyə can atmaq mənasızdır, çünki heç bir ölkə mərmilərin “belə istehlak səviyyəsinə tab gətirə bilməz”. Lakin o, əmindir ki, Ukrayna “bütün azad dünyanın arsenalına” bərabər olacaq həcmdə sursat istehsal edəcək.

Keçən həftə ABŞ administrasiyası Konqresdən 100 milyard dollardan çox təcili yardım paketi istəyib və bu vəsaitin əsas hissəsinin (61,4 milyard dollar) Ukraynaya verilməsi planlaşdırılır. Pulun bir hissəsi də İsrailin HƏMAS ilə münaqişəsinin kəskinləşməsi fonunda ona ayrılacaq. “Axios” portalı ABŞ-ın İsrailə Ukrayna üçün nəzərdə tutulan on minlərlə 155 mm-lik artilleriya mərmisi verəcəyini bildirib.

Rusiyanın müdafiə naziri Sergey Şoyqu dünən, oktyabrın 23-də bildirib ki, Ukraynada xüsusi əməliyyat zonasında yerləşən Rusiya hərbçilərinə gündəlik 10-15 min tona qədər yanacaq və mərmi verilir.