ABŞ Dövlət Departamenti Kurskda baş verənləri şərh edib

Dövlət Departamentinin sözçüsü Metyu Miller bildirib ki, Ukrayna tərəfi Kursk vilayətinə hücum planları barədə ABŞ-a əvvəlcədən məlumat verməyib. "Səs" qəzeti xarici mənbələrə istinadən xəbər verir ki, Miller hücum zamanı Amerika silahlarından istifadə edilib-edilməməsi ilə bağlı sualı Pentaqona yönəldib.

Brifinq zamanı jurnalistlər Dövlət Departamentinin nümayəndəsindən ABŞ-ın Ukrayna silahlı qüvvələrinin Kursk vilayətində Rusiya sərhədini yarmaq planlarından xəbərdar olub-olmadığını soruşublar. “Xeyr, amma ukraynalıların öz taktikalarını həyata keçirməzdən əvvəl bizə bildirməmələri qeyri-adi deyil. Onlar əməliyyat aparır, biz onlara silah, məsləhət veririk. Bəzən onlarla əlaqə saxlayırıq, bəzən də yox. Bu qərarları özləri verirlər”, - Metyu Miller cavab verib.

Millerdən Ukraynanın ona verilən Amerika silahlarından Rusiya ərazisinə, o cümlədən Kursk bölgəsinə hücumlar üçün istifadə edə biləcəyi sualı da verilib. “Bu məsələ ilə bağlı mövqeyimiz dəyişməyib. Bizim qaydalarımızı pozan olmayıb” deyə cavab verib.

May ayında ABŞ Xarkov vilayətində hücum fonunda Ukraynaya Amerika silahları ilə Rusiya Federasiyasının ərazisinə zərbələr endirmək üçün məhdud icazə verib. Rəsmi olaraq bildirilib ki, Kiyevə hücumun başlandığı əraziyə zərbələr endirməyə icazə verilib. Hücum üçün uzaqmənzilli raketlərdən istifadə etmək qadağandır.

Avqustun 6-da səhər tezdən Ukrayna Silahlı Qüvvələri Kursk vilayətinin sərhəd rayonlarına hücum edib. Rusiya Silahlı Qüvvələri Baş Qərargahının son məlumatlarına görə, sərhədə bitişik ərazilərdə toqquşmalar davam edir, lakin Ukrayna bölmələrinin Rusiyanın dərinliklərinə doğru irəliləməsi dayandırılıb. Kursk vilayətində fövqəladə vəziyyət elan edilib və yerli sakinlər təxliyə edilir. Səhiyyə Nazirliyinin məlumatına görə, hücum nəticəsində 31 nəfər yaralanıb. Kursk səlahiyyətliləri beş nəfərin öldüyünü bildirib.