Rusiya Xarkovu yenidən atəşə tutub, 14 mülki şəxs yaralanıb

Bazar ertəsi Rusiya qoşunları Xarkov və onun ətraf rayonlarını yenidən atəşə tutub. Regional hərbi idarənin rəisi Oleq Sinequbovun sözlərinə görə, idarə olunan bombalardan istifadə edilib. SİA-nın əldə etdiyi məlumata görə, dağıntılar və yanğınlar baş verib.

Xəbərin dərci zamanı şəhər və rayondan 14 mülki şəxsin yaralandığı məlum olub. Xarkov meri İqor Terexov bildirib ki, atışma yaşayış binalarının sıx olduğu ərazilərdə baş verib.

Qeyd edilməlidir ki, Rusiya ilə sərhədə yaxın ərazidə yerləşən Xarkov son aylarda mütəmadi olaraq raket və idarə olunan bombaların hücumuna məruz qalır, şəhər sakinləri müntəzəm olaraq ölür və yaralanır.

Sentyabrın 1-də rus qoşunları şəhərə ən azı 10 zərbə endirib, 40-dan çox insan yaralanıb. Avqustun 30-da Rusiyanın atəşi nəticəsində 12 mərtəbəli yaşayış binasına ziyan dəyib. Zərbə nəticəsində 14 yaşlı qız da daxil olmaqla 6 nəfər həlak olub. Yaralıların sayı 97-yə çatıb. Şəhərdə matəm elan edilib.

Əli Babayev