Hüquq müdafiəçiləri Monqolustanı Putini həbs etməyə çağırırlar

…Rusiya prezidenti Vladimir Putin Monqolustana səfər edib. Bu barədə Rusiya xəbər agentlikləri məlumat yayıb. Onlar Putinin təntənəli iclasının videosunu yayırlar - aerodromda fəxri qarovul düzülüb. Ölkədə indi axşam gecdir.
SİA-nın əldə etdiyi məlumata görə, bu, Putinin Beynəlxalq Cinayət Məhkəməsinin Roma Statutunu ratifikasiya etmiş ölkəyə onun həbsinə order verilən keçən ilin martından bəri ilk səfəridir.

Rusiya prezidenti ukraynalı uşaqları Kiyevin nəzarətində olmayan ərazilərə qanunsuz daşımaqda ittiham olunur. Əvvəllər bildirilirdi ki, Putin Xalxin-Qol çayında sovet və monqol qoşunlarının Yaponiya silahlı qüvvələri üzərində birgə qələbəsinin 85-ci ildönümünə həsr olunmuş tədbirlərdə iştirak etmək üçün sentyabrın 3-də Monqolustana səfər etməli idi.

Onu ölkə prezidenti Uxnaaqiyn Xurelsux dəvət edib.

"Human Rights Watch" səfərdən əvvəl verdiyi bəyanatda bildirib ki, Monqolustan ya Vladimir Putinin ölkəyə girişini qadağan etməli, ya da Beynəlxalq Cinayət Məhkəməsinin orderi əsasında ölkəyə daxil olarsa, onu həbs etməlidir. Hüquq müdafiəçiləri qeyd edirlər ki, Monqolustan onun ölkəyə səfərinə icazə versə və orada onu həbs etməsə, Beynəlxalq Cinayət Məhkəməsinin üzvü kimi beynəlxalq öhdəliklərini pozacaq.

Human Rights Watch-un fikrincə, Putini qəbul etmək təkcə Rusiya qüvvələrinin cinayətlərinin qurbanlarının çoxunu təhqir etməyəcək, həm də qanunun aliliyi prinsipini pozacaq.

Bloomberg-in məlumatına görə, Ulan-Bator Putini ölkəyə gələn kimi saxlamayacağına inandırıb.

…Və yeri gəlmişkən, Monqolustan 2003-cü ildə Beynəlxalq Cinayət Məhkəməsyə üzv olub. Müqaviləyə əsasən, ölkə məhkəmə ilə əməkdaşlıq etməli, o cümlədən ərazisinə daxil olan hər hansı şübhəli şəxsi həbs edib ekstradisiya etməlidir.

Əli Babayev