İsrail əsgəri türk fəalı öldürdü

İsrailli qeyri-qanuni məskunlaşanların qanun pozuntularına qarşı fələstinlilərə dəstək olmaq üçün İordan çayının qərb sahilinə gedən türkiyəli sülh fəalı Ayşenur Ezgi Eygi İsrail snayperlərinin hədəfi olub. SİA xarici mətbuata istinadən xəbər verir ki, Xarici İşlər Nazirliyi "qətl" kimi qiymətləndirdiyi hadisəyə sərt reaksiya verib.

İşğal altındakı İordan çayının qərb sahilində İsrail əsgərləri tərəfindən başından canlı güllə ilə vurulan Ayşenur Ezgi Eygi adlı türkiyəli sülh fəalı həyatını itirib. Antaliyada doğulmuş, ABŞ pasportu da olan 26 yaşlı Eyginin Nablusun cənubundakı Beyta qəsəbəsində hər həftə məskunlaşanların cinayətlərinə qarşı keçirilən dinc etiraza qatıldığı və İsrail snayperinin hədəfinə çevrildiyi bildirilib.

Başından güllə yarası alan Eygi Nablusdakı Rəfidiyə xəstəxanasına aparılarkən xəstəxananın baş həkimi Fuad Nafia əllərindən gələni etdiklərini, lakin həyata qaytara bilmədiklərinə görə çox təəssüfləndiklərini bildirib. O, Eyginin snayper tərəfindən qəsdən başından hədəf alındığını iddia edib.