Serbiya Prezidenti: Avropa İttifaqına üzvlük yoluna sadiqik

Serbiya Prezidenti Aleksandar Vuçiç ilə Avropa Komissiyasının Prezidenti Ursula Fon der Lyayen arasında telefon danışığı olub. SİA xəbər verir ki, Aleksandar Vuçiç bu barədə sosial media hesabındakı paylaşımda qeyd edib.

O bildirib ki, söhbət zamanı Serbiyada və bölgədəki mövcud vəziyyət, ölkənin Avropa İttifaqına üzvlük yolu və həyata keçirilən islahatlar barədə müzakirələr aparılıb.

"Biz islahat gündəliyinin həyata keçirilməsini sürətləndirməyə və 2026-cı ilin sonuna qədər başa çatdırmağı planlaşdırdığımız iş olan Aİ meyarlarına uyğunlaşmaya sadiq qalırıq. İnanıram ki, üzv dövlətlər bizim fəaliyyətimizi və tərəqqimizi tanıyacaq, Serbiyaya genişlənmə prosesində ən yaxşı şəkildə istifadə etmək imkanı verəcək və 3-cü Klasterin açılışına "yaşıl işıq" yandıracaq", - deyə Aleksandar Vuçiç vurğulayıb.

Serbiya Prezidenti ölkəsinin milli maraqlara uyğun olaraq Aİ-nin ümumi xarici və təhlükəsizlik siyasətinə uyğunlaşma prosesinə sadiqliyini və regionda sülhün, sabitliyin və əməkdaşlığın qorunmasına dair prinsipial mövqeyini bir daha təsdiqləyib.