İlon Mask NATO-nu tamamilə yenidən qurmağa çağırıb

ABŞ Hökumətin Effektivliyi Departamentinin rəhbəri, milyarder İlon Mask NATO-nu yenidən qurmağa çağırıb. SİA xəbər verir ki, bu barədə İlon Mask sosial şəbəkədə paylaşım edib.

"NATO-nu yenidən tamamilə formalaşdırmağa ehtiyac var", - deyə o, rəhbəri olduğu X şəbəkəsində Yuta ştatından olan senator Mayk Linin paylaşımını şərh edərkən bəyan edib. Qeyd edək ki, senator "soyuq müharibə başa çatandan" sonra NATO-nu anaxronizmə çevrilmiş alyans adlandırıb.

Ötən ilin mart ayında Mask sərmayəçi Devid Daksın NATO-nun nüfuzunu itirdiyi və ləğv olunmağa ehtiyac olduğu ilə bağlı fikrini bəyənmişdi.

"Doğrudur. Həmişə NATO-nun mövcud olmasına təəccüblənmişəm, bir halda ki, onun rəqibi və mövcud olma səbəbi olan Varşava paktı ləğv olunub" – deyə Mask X sosial şəbəkəsində qeyd edib. Onun bu bəyanatı bir çoxları tərəfindən tənqid olunub.