Təhlükəsizlik zəmanətlərinin komponentləri açıqlandı

ABŞ dövlət katibi Marko Rubio Ukrayna üçün təhlükəsizlik təminatlarını hazırlayacaq işçi qrupuna rəhbərlik edəcək, mənbələr bildirirlər. Ukrayna üçün gələcək təhlükəsizlik zəmanətləri dörd əsas komponentdən ibarət olacaq. Bu barədə bir gün əvvəl “The Wall Street Journal” danışıqlarla tanış olan avropalı rəsmilərə istinadən məlumat yayıb.

İddia olunur ki, avqustun 18-də ABŞ prezidenti Donald Tramp və Avropa liderləri ABŞ dövlət katibi Marko Rubionun Ukrayna üçün təhlükəsizlik təminatları hazırlayacaq milli təhlükəsizlik müşavirləri və NATO nümayəndələrindən ibarət işçi qrupuna başçılıq edəcəyi barədə razılığa gəliblər.

Ukrayna üçün gələcək təhlükəsizlik zəmanətləri dörd əsas komponentdən ibarət olacaq:

hərbi mövcudluq;
hava hücumundan müdafiə sistemləri;
silahların çatdırılması;
hərbi əməliyyatların dayandırılmasının monitorinqi.

İddia olunur ki, Amerika qoşunlarını birbaşa Ukrayna ərazisinə daxil etmədən ABŞ-ın avropalı sülhməramlılara dolayı yolla hərbi dəstək verə biləcəyi variantlar var.

Xatırladaq ki, avqustun 16-da mətbuatda Alyaska sammiti zamanı Tramp və Putinin guya Ukrayna üçün təhlükəsizlik təminatları barədə razılığa gəldiyi barədə məlumat yayılmışdı. Onlar Şimali Atlantika Müqavilənin “5-ci maddəsinin üslubunda” olacaqlar, lakin NATO çərçivəsində deyil. Daha əvvəl bu məlumatı əslində Trampın özü də mediaya təsdiqləyib. Onun sözlərinə görə, ABŞ, Avropa və bəzi başqa ölkələr Ukraynaya təhlükəsizlik zəmanəti verə bilər, lakin NATO formatında deyil.

Və bu gün Ukrayna prezidenti Vladimir Zelenski təsdiqləyib ki, həqiqətən də Ukrayna üçün təhlükəsizlik zəmanətləri veriləcək və yaxın günlərdə onlar üzərində aktiv iş aparılacaq.

VƏLİ