Tramp Rusiya nefti ilə bağlı Aİ-yə təzyiq etmir - Aİ komissarı

Avropa İttifaqı 2028-ci ilə qədər Rusiya neftinin idxalını tamamilə dayandırmaq planına sadiqdir. Bunu Aİ-nin enerji məsələləri üzrə komissarı Dan Yorgensen Reuters agentliyinə şərhində bildirib. Onun sözlərinə görə, o, şəxsən ABŞ-dan bu müddəti sürətləndirmək üçün təzyiq hiss etməyib, lakin Vaşinqtonun dəstəyini alqışlayacaq.

"Putin enerjidən bizə qarşı silah kimi istifadə edib, üzv dövlətləri şantaj edib. Biz də Putinin müharibəsini maliyyələşdirməyə kömək edirik və buna son qoyulmalıdır. Prezident Tramp bununla razılaşarsa, bu, çox xoşdur, çünki bu, bizim əsas məqsədimizdir", - Yorgensen vurğulayıb.

Aİ 2028-ci il yanvarın 1-dək Rusiya nefti və qazını mərhələli şəkildə dayandıracaq hüquqi təkliflər üzərində danışıqlar aparır. Macarıstan və Slovakiya hazırda gündə təxminən 200-250 min barel Rusiya nefti idxal edir (AB-nin ehtiyaclarının təxminən 3%-i) və daha yüksək qiymətlərdən qorxaraq plana qarşı çıxırlar. Aİ-nin Rusiya qazının alışı əhəmiyyətli dərəcədə yüksək olaraq qalır. Aİ-nin məlumatına görə, Avropa bu il qazının təxminən 13%-ni Rusiyadan almağı planlaşdırır, bu, Rusiyanın 2022-ci ildə Ukraynaya tam miqyaslı işğalından əvvəl təxminən 45%-dən aşağıdır.

Yorgensen təsdiqləyib ki, bu ölkələrin hökumətləri ilə məsləhətləşmələr davam edir, lakin onların razılığı olmadan qərar qəbul edilə bilər.

Aİ-nin energetika nazirlərinin gələn ay keçiriləcək iclasda təkliflərə baxacağı gözlənilir.

Daha əvvəl Vladimir Zelenski bildirib ki, Donald Tramp söhbət zamanı Macarıstan və Slovakiyanın Rusiya neftini almasından narazılığını bildirib, çünki bu, Kremlin döyüş maşınının maliyyələşdirilməsinə kömək edir.

VƏLİ