Yermak ittiham olunmayıb - Media

Ukrayna Prezidentinin Ofisinin rəhbəri Andrey Yermak NABU və SAPO tərəfindən aparılan axtarışlardan sonra ittiham olunmayıb. SİA-nın məlumatına görə, "İnterfaks-Ukrayna" korrupsiyaya qarşı mübarizə qurumlarındakı mənbəyə istinadən xəbər verir. Agentliyin mənbəyi bildirib ki, NABU və SAPO Yermakın evində axtarışları Ali Antikorrupsiya Məhkəməsinin istintaq hakiminin qərarı əsasında aparıb.

O qeyd edib ki, "ittiham barədə heç kimə məlumat verilməyib".

Adı açıqlanmayan mənbənin sözlərinə görə, hazırda istintaq hərəkətləri davam edir.

28 noyabr cümə günü səhər "Ukrayinskaya Pravda" qəzeti NABU və SAPO-nun Prezident Ofisinin rəhbəri Andrey Yermakın hökumət məhəlləsindəki evində axtarış apardığını bildirib.

"Ukrayinskaya Pravda" qəzeti Kiyevin mərkəzindəki hökumət məhəlləsindən bir fotoşəkil dərc edib və orada təxminən 10 NABU və SAPO əməkdaşının binaya daxil olduğunu bildirib.