Daşqınlarda ölənlərin sayı 950 nəfərə çatıb

İndoneziyanın Sumatra adasında baş verən güclü daşqın və torpaq sürüşmələri nəticəsində azı 950 nəfər həlak olub, daha 274 nəfər isə hələ də itkin düşmüş hesab olunur.

Bu barədə İndoneziyanın Təbii Fəlakətlərin İdarə Edilməsi üzrə Milli Agentliyi məlumat yayıb.

Agentliyin açıqlamasına görə, təbii fəlakət nəticəsində 5 minə yaxın insan xəsarət alıb.

Qeyd edək ki, daha əvvəl ölənlərin sayının 900 nəfəri keçdiyi bildirilirdi.

İndoneziyanın Milli Axtarış və Xilasetmə Agentliyinin məlumatına əsasən, fəlakətə noyabrın sonundan etibarən bölgədə davam edən güclü yağışlar səbəb olub. Sellər yaşayış evlərinə, yollara və infrastruktur obyektlərinə ciddi ziyan vurub, xilasedicilərin ən çox zərər çəkmiş ərazilərə çıxışını çətinləşdirib.